Gaia Trafikk har fått rundt 1000 fleire
studentar til å kjøpe kort kvar månad.
Ordninga med 35 prosent rabatt er ein suksess blant bussreisande
studentar.
I oktober vart studentrabatten på månadskort
hos busselskapa utvida frå 25 til 35 prosent. Det
var Fylkesutvalet i Hordaland som løyvde pengane
til dette. Hos Gaia Trafikk kjøper no rundt 4000
bergensstudentar studentmånadskort.
– I oktober gjekk salet av månadskort for studentar
til vêrs. I september selde Gaia 3200 månadskort
med 25 prosent rabatt. Månaden etter var talet kome
opp i 4200, fortel Tor Harald Rødseth, førstekonsulent
i Samferdsleseksjonen i Hordaland.
4000 i månaden
Rødseth meiner salet av månadskort hos
Gaia Trafikk kjem til å liggje på rundt 4000
dei månadane studentane er på skulen. I november
var det 3900 som kjøpte studentmånadskort.
– I desember og januar var salet noko dårlegare,
på grunn av eksamenstid og juleferie, meiner Rødseth.
Ordninga med 35 prosent studentmoderasjon på månadskort
gjeld for alle over 20 år som studerer i Hordaland.
Er du under 20 år kan du kjøpe ungdomskort,
som er enno billegare.
35 prosent også i 2002?
Det er fylkeskommunen som subsidierer rabattordningane.
I februar i fjor vart det innført 25 prosent moderasjon
på månadskort for studentar, frå 1. oktober
vart rabatten utvida til 35 prosent. Tor Harald Rødseth
trur sjansane er gode for at ordninga med 35 prosent moderasjon
vil bli vidareført. I oktober 2002 skal komiteen
for miljø og samferdsel i fylket evaluere rabattordninga.
- I 2001 brukte fylkeskommunen 4,7 millionar på å
subsidiere studentrabatt på bussar. Går fylkesutvalet
inn for å vidareføre ordninga med 35 prosent
moderasjon, vil beløpet nærme seg 10 millionar
for 2002, seier Rødseth.
