 |
TRAKASSERT: Narmin Saber kjenner seg dårleg behandla
av vakten på Kvarteret.
|
BI-student Narmin Saber vart kasta halvnaken ut frå
Kvarteret av ei vakt ho opplevde som svært valdeleg. No
etterlyser ho ei orsaking frå studenthuset.
Ein fredag i byrjinga av oktober i fjor kom Narmin og
nokre vener til Stjernesalen for å dele ei flaske vin.
I løpet av kvelden vart ho akutt dårlig, og fekk oppkast
på kleda sine. Ei vakt ba henne då om å forlate lokalet,
så ho gjekk inn på handikaptoalettet for å tørke av kleda.
Dette var vakta ikkje fornøgd med. Han låste seg inn på
toalettet der Narmin hadde teke av seg BH, topp og jakke.
Så bar han henne halvnaken gjennom folkemengda og ut på
fortauet. Narmin måtte stå ein halvtime i drosjekø, kun
iført ein tynn, enkeltknept cardigan.
- Vakta overreagerte fullstendig
Narmin har vore fast gjest på Kvarteret i mange år.
Ho vil ikkje annmelde denne saka, sjølv om det kunne vere
grunnlag for å gjere det. - Han tok meg praktisk talt
på puppane, og alle som stod rundt kunne sjå det dei ville
då han bar meg ut, seier ho. Ho vil ikkje akkurat flagge
dette som det verste som har skjedd i heile livet hennar.
Men ho etterlyser ei orsaking, og at oppførselen til vakta
vert forklart. Ho synest også det er merkeleg at dei ikkje
ville oppgi namnet på vakta då ho klaga. - Eg ser ikkje
heilt kva slags trussel ei jente på 1,50 utgjer for sikkerheita
på Kvarteret, seier ho.
Eigars rett
Ved ordensavdelinga i Politikammeret seier dei at
det forekjem ein del valdsepisodar med vakter på utestadar,
difor har dette vore eit satsingsområde. Dei har prøvd
å kome problemet til livs ved å arrangere kurs for ordensvakter.
For å kunne ta dette kurset må ein frå før ha plettfri
vandel. Ordensvakter og dørvakter skal sørge for å hevde
eigars rett på utestadar, og kan ifølge lova bortvise
og hindre uønska personar i å kome inn på utesteder. Men
dei skal ikkje gå til handgripelegheiter. Dersom dette
er nødvendig skal dei tilkalle politiet. Reidun Helle
ved Securitas seier at deira vakter prøvar å geleide uønska
personar bort frå staden. Dei gjeng ikkje til handgripelegheiter,
med mindre personen ikkje er i stand til å kome seg ut
for eiga maskin.
Flate for kritikken
Vaktetaten på Kvarteret beklagar sterkt det som har
hendt i denne saka. - Vakta har nok i dette tilfellet
mistolka situasjonen, og trudd at gjesten var overstadig
berusa. Men instruksen seier at vaktene uansett ikkje
skal legge hand på gjestane. Vi har heilt klare bestemmelsar
på dette, seier Unni Caspersen som er skjenkeansvarleg
ved Kvarteret. Alle vaktene som jobbar ved Kvarteret har
gjennomgått ordensvaktkurset hjå Politiet. Grunnen til
at denne klagen ikkje har vorte behandla før, trur ho
dels er misforståingar og dels at huset har hatt mykje
turbulens i administrasjonen i det siste. Ho seier at
vaktene har svært klare føreskrifter om korleis dei skal
opptre overfor gjestane. - Først og fremst vil vi at Kvarteret
skal vere ein triveleg stad for gjestane, seier Caspersen.
- Kva er eigentleg greia med at de ikkje kunne oppgi namnet
på vakta? - Det er ein bevisst politikk frå vår side at
vi ikkje oppgir namnet på vaktene i slike saker før dei
er ferdigbehandla. Det kan forekome at valdelege gjestar
oppsøker vaktene privat, seier Caspersen.
