73 og like blid

Om to år skal far min pensjonere seg. Då blir han 62. Resten av livet vil han tilbringe på avsidesliggande plassar i Hellas, og kanskje, men berre kanskje, kjøpe seg bobil. Far min er som dei fleste andre av sin generasjon: Han er lei av å arbeide, og vil ha det feitt til han er 100.

Det vil sjølvsagt eg også. Men i forrige veke kom eit skot for baugen på den feite planen. Pensjonkomiteen, oppnemnt av Ap, fortalde meg at eg måtte jobbe lenger. Eg måtte stå til eg blei 70, sa dei. Eg måtte jobbe i 40 år for å få full pensjon.

Eg sette meg ned for å rekne. 30, 40, 50, 70, telte eg høgt. Ein kraftig lysstråle slo mot meg, og som i ein visjon såg eg korleis den 73 år gamle meg sat bak skrivebordet. Eg talde på knappane: Har eg råd til å pensjonere meg no?

Høg utdanning har aldri lønt seg i Noreg - og pensjonsforslaget rører ikkje ved det. Å bruke lang tid på å utdanne seg har ikkje ført til andre ulemper enn gigantisk lånekassegjeld. Med forslaget blir dei som kjem sist i arbeid dei desiderte taparane. Har du ruga på hovudfagsoppgåva i fire år, får du svi. Ver vennleg å jobbe fire år ekstra, seier Pensjonskomiteen og klør seg i metusalemskjegget.

Vidareutdanning, eit sosialdemokratisk nyord frå 60-talet, kan du berre gløyme. Du får ikkje tid til denslags om du skal tryggje ensjonen. Sabbatsår? Nei nei, ikkje tenk på det. Kvart einaste år tel når du har blitt 70. Utan inntekt er du ei uproduktiv byrde for samfunnet. Du har versågod å jobbe det inn igjen. Norsk Studentunion er blant dei som vil uttale seg om pensjonsreformen - og har lansert eit forslag som faktisk vil gagne den vanlege student: Ten opp pensjon i studietida. Pensjonspoeng for kvart studieår fører til at studentar likevel ikkje vil tape alt for mykje på å ta høgare utdanning. Det er eit godt forslag som studentar må omfamne, om Metusalem sjølv, pensjonsgeneral Sigbjørn Johnsen, skal kunne støtte opp om det.

I alle fall kan ei slik ordning føre til at også eg får råd til ein bobil som pensjonist. Kanskje, men berre kanskje, får eg lyst på ein. Sjølvsagt, eg kjem ikkje til å vere 62 når eg går av med pensjon. Her skal vi arbeide. Eg ser for meg min nystarta pensjonistkarriere: 70 år, like blid, og med ein bobil i garasjen.

Studvest
følger saken:

Kvalitets-
reformen

Siste artikkel:
20. august 2003
Antall artikler: 36

Lånekassen

Siste artikkel:
11. september 2002
Antall artikler: 11