Ansvarleg redaktør:
|
|
|||||||||||||||
– Det går mykje rykte om kva som kjem til å skjer her. Det er dårlig tilbod for oss under 18 i Bergen. Her kan vi sitte og prate og kose oss, seier 16-åringane Yngvild Greine og Helene Holm. Dei tar ofte turen til kafeen på 1880. Byrådet i Bergen må spare pengar. Frå 1. mai blir Ungdomshuset 1880 og Bergen Internasjonale Kultursenter (BIKS) samla. Det betyr kamp om plassen. Ungdomar Studvest har snakka med, uttrykker skepsis og frykt for kva som skal skje med byens mest populære ungdomstilbod. – Dette er eit bra tilbod. Ungdomane har eit anna tilbod enn Galleriet, seier Helene Holm. Dei to jentene trur det er lurt av kommunen å ha ein stad for dei unge. Fleire studentorganisasjonar som i dag held til på 1880, må finne seg nye lokale. Hulen, Bergen Student-TV og Transitteateret er mellom dei som nå blir kasta ut. MOT SLUTTEN FOR 1880? Bystyremedlem Jan Kristian Mathiassen (Ap), meiner prioriteringane til Byrådet er feilslåtte. – Eg er redd for at 1880 vil miste sin opphavelege funksjon. Det er ei sjølvfølgje at tilbodet vert dårlegare. Eit slikt forslag ville aldri fått gjennomslag i eit Ap-byråd, hevdar han. Mathiassen er uroa for både tilbodet til dei unge og byens innvandrarar. – BIKS har i dag kvinner frå 22 land. Dette er kvinner som ikkje har noko anna tilbod, og som neppe vil finne seg til rette på 1880, seier han. Ap-politikaren meiner at å kutte i desse tilboda, på sikt kan gje samfunnet ei langt større rekning. Han får støtte frå Hulen-leiar Jo Rasmussen. – Gjennom 1880 har Bergen hatt ei moglegheit til å få ein oppegåande kulturgenerasjon. Eg trur 1880 med dette vil forsvinne på sikt, seier Rasmussen. Hulen har dei siste to åra hatt kontor i 1880-bygget, men må no finne andre lokale. VIL IKKJE KJEMPE Dagleg leiar ved Ungdomshuset 1880, Ingeborg Tysnes, vedgår at ho er bekymra for profilen til huset. – Folk spør seg kven sitt hus det blir. Det ser ut til at ungdomane og BIKS får ulike dagar i veka, men kafeen vil framleis berre være for dei unge, seier Tysnes. – Studentorganisasjonane har ikkje vært vår målgruppe, men det er klart at dei har tilført ungdomane mykje i sitt nærvere, seier ho. Ho legg ikkje skjul på at det blir svært trongt med heile BIKS i same hus. Noko vidare kamp mot kommunen har ho derimot ikkje planar om. – Nei avgjersla ligg hos Byrådet, ikkje her på huset, seier Tysnes. Det lukkast ikkje Studvest å komme i kontakt med ansvarleg byråd, Henning Warloe (H). 18.02.04 |
|
|
|
|
||||||||||||
