Frynsegode og anna godis
Har du inntrykk av at NHH studentane vassar i frynsegode,
medan universitetsstudenten er heldig dersom han får studentpakken
i byrjinga av semesteret? Det viser seg at inntrykket langt
på veg stemmer.
Tekst: RAGNHILD KONGSVOLL og BÅRD OPSANGER
– Kvart semester har vi mange bedriftspresentasjonar med gratis øl og pizza etterpå, seier informasjonsansvarleg i studentforeininga på Noregs Handelshøyskule (NHHS), Håvard Wolstad.
Men Wolstad fortel om dårlege tider for bedriftspresentasjonar.
– Tidlegare har vi hatt over 50 presentasjonar i semesteret, då hadde vi jo gratis øl og pizza nesten kvar dag. I år har vi berre hatt 27, seier han.
Hausten 2003 sette SV-fakultetet eigen rekord med ti bedriftpresentasjonar.
NHHS, har i dag seks hovudsamarbeidspartnarar: KPMG, Microsoft, Netcom, Peppes, SAS og Hansa bryggerier. Desse gjev studentforeininga og studentane alt frå PC'ar og programvare, til mobilabonnement med særs gode vilkår.
– I tillegg får Uken god sponsing, noko som gjer det mogleg for oss å gi eit godt tilbod til dei frivillege. Vi er opptatt av å gjere det attraktivt å arbeide med velferd for studentane, og det dryp derfor ekstra på dei, seier Wolstad.
GOD ANDREPLASS
Juristforeininga har greidd å skrapa restane av sponsorinntekter i Bergen. Dei har i dag advokatfirmaet Wikborg Rein som hovudsponsor. Dei sponsar foreininga med eit pengebeløp av ukjent storleik, som går med til ulike arrangement.
– Vi har òg mange andre støttespelarar som profilerer seg ved ulike arrangement, seier Ola Neergård i sponsorkomiteen til Juristforeininga.
– Sponsinga gjer det mogleg for oss å gjennomføre arrangement billig, slik at alle kan få vere med. Til dømes held vi kvart år vinterleiker der vi konkurrerer med jussen i Oslo. Ved å kjøpe ned prisen på reise og opphald, er det ikkje økonomien som bestemmer kven som skal få vere med, seier han.
FORSIKTIGE FORSØK
Ingeniørane på Høgskulen har også hatt næringslivet på besøk.
– Til no i år har vi skaffa fire-fem bedriftspresentasjonar. Deltakarane fekk gratis øl og pizza, og vi hadde eit utruleg godt oppmøte, fortel leiaren i Studentparlamentet på høgskulen, Jon Erling Nordbø.
Hovudfagselevar på SV-fakultetet starta næringslivsutvalet Lexwell i 1997. Utvalet kontaktar bedrifter og gir dei tilbod om å presentere seg for studentane.
– Vi såg behovet for nærmare kontakt mellom SV-studentar og det private næringslivet, fortel organisasjonskoordinator Siri Stuveseth.
Omtrent halvparten av bedriftene spanderer pizza, øl og småprat etter presentasjonen.
LITE SPONSING
Elles verkar det ikkje som studentane ved Universitetet eller Høgskulen ser nytta av å ha kontakt med næringslivet. Våre framtidige medisinarar har tidlegare vore kjend for eit omstridt forhold til legemiddelfirma, men dette skal no vere avslutta.
– Vi hadde tidlegare eit samarbeid med eit legemiddelfirma, men vi har no kome
fram til at den type avtalar ikkje skal vere lov, fortel leiar
i Norsk Medisinerstudentforening i Bergen, Per Øystein Opdal.
 GRANDIOSA: Kven treng Grandiosa når ein få billig pizza på Peppe´s? NHH. Studentane Ølver Haveland og Carl Fredrik Husby tar seg ein pause i eksamenslesinga.
Foto: MARTE VIKE ARNESEN Øl og pizza
Studentar ved Norges Handelshøyskole, har kanskje
dei beste sponsoravtalane i landet. Studentane, Carl Fredrik
Husby og Ølver Haveland frå NHH klagar iallfall ikkje.
Tekst: BÅRD OPSANGER
– All kreditt til NHHS, seier Carl Fredrik, mens han stikk gaffelen i pizzaen.
– Må ha kniv og gaffel, går jo på NHH veit du, gliser han.
Dei er begge to veldig nøgde med arbeidet til studentforeninga si. Men dei tar nok kanskje alt arbeidet som ligg bak litt som ein sjølvfølge.
BILLIG ØL = GODT MILJØ
Handelshøgskolen er kjend for godt og samansveisa miljø. I tillegg til at Hansa har sponsa sjølve bardisken i Klubben, har NHHS i følgje eigne nettsider ein eksklusiv avtale med Hansa om øl. Avtalen gjer det mogleg for dei å halda byens lågaste pris, noko som ikkje akkurat gjer miljøet noko mindre inkluderande.
– Avtalen subsidierer fylla, som drep fleir og fleir hjerneceller, no hugsar eg ikkje ein gong koden på minibankkortet, seier Carl Fredrik tørt.
INGEN ETISKE PROBLEM
Carl Fredrik og Ølver ser ingen etiske problem med sponsinga.
– Så lenge ein skiller mellom skulen, altså det faglege, og studentane, er det berre positivt med sponsing.
– Bedriftene gjer dette for å skapa kontakt med studentane, ikkje for å få nokon økonomiske motytingar er dei enige om.
BILDETEKST:
GRANDIOSA: Kven treng Grandiosa når ein ha billig pizza på Peppe´s? NHH. Studentane Ølver Haveland og Carl Fredrik Husby tar seg ein pause i eksamenslesinga.
Treng ikkje vera feil
– Sponsing kan i utgangspunktet vera heilt legitimt, men kan og vera svært kritikkverdig, seier undervisar i etikk ved NHH, Knut J. Ims.
Tekst: BÅRD OPSANGER
Han meiner det kjem veldig an på situasjonen.
– Dersom verksemdene ikkje får nokon særfordeler er sponsing heilt greitt. Det ein skal unngå er korrupsjon, seier han.
Korrupsjon vil vera dersom det gjennom sponsinga til dømes er underforstått at mottakaren skal gje motytingar, eller det blir inngått ein avtale der sponsaren får særfordelar for gåva, forklarer han.
– Det kan vera eit problem dersom det berre er ein hovudsponsor eller beløpa er veldig store. Det kan då vera lurt å vera litt skeptisk, og sjå nærare på eventuelle klausular og liknande, seier han.
– Det viktigaste er å ikkje ha skjulte sponsorar, men vera openlys, seier Ims.
|
