Tidleg snø på Sørvestlandet

ÅDNERAM SKITREKK: Webkameraet i Ådneram skitrekk syner eit tynt snølag ved skiheisen.

Foto: Webkamera Ådneram Skitrekk

Då Ragnar Ramstad kom heim frå ein tur i Sauda sentrum i dag blei han overraska av synet som møtte han.

Regnet i sentrum hadde kome som snø på fjella i Svandalen som han har utsikt til frå stova si.

– Nå kan det sjå ut som om eg må gå på rypejakt med trugar, seier Ramstad som sikra seg eit bilete av den tidlege snøen.

• Les òg: Snø på i Ådneram skitrekk
• Les òg: Slik blir helgevêret

Kjem meir i helga

Meteorologisk institutt sende torsdag kveld ut varsel om snø og vanskelege køyreforhold på fjellovergangane i Sør-Norge fredag.

Temperaturen er venta å bli lågare i helga, noko som kan gjera at snøen som kjem blir liggjande og at det også vil koma meir.

– I løpet av helga kan nok høgdegrensa for snøen koma ned i 600 meter, seier statsmeteorolog Ivar Gjellestad ved Vêrvarslinga på Vestlandet.

• Sjekk vêret på yr.no

Det er også venta bøyevêr, men dette skal ifølgje meteorologen minke utover helga. Det blir derfor ikkje snakk om store mengder snø som vil koma, og etter helga skal det vera slutt.

– Då skal temperaturane stiga, og me ventar at snøen vil forsvinna, seier Gjellestad.

Brøytebilane har vore ute

Torsdag ettermiddag måtte fylkesveg 337 brøytast på grunn av snø på fjellovergangen mellom Suleskard og Brokke. Verst skal køyreforholda ha vore på Sirdal-sida.

– Fleire bilar med sommardekk blei ståande fast i dei bratte bakkane, seier Helge Bjunes i Risa til Agder. Han trur det er kome 5–10 centimeter snø på vegen.

• Les òg: Må vurdera vinterdekk i Sogn og Fjordane
• Les òg: Til helga kjem vinteren i nord

Vegtrafikksentralen seier at køyreforholda framleis blir rekna som vanskelege på fjellovergangen grunna snø.

– Nå er me i gang, seier Roger Lemme i Vegtrafikksentralen om den tidlege snøen.

Brokke – Suleskard blir stengt frå og med 1. november.