Kap. X - Misleghaldne lån som er permanent overførte til Statens innkrevjingssentral i 2003

1 LÅN SOM ER PERMANENT OVERFØRTE TIL STATENS INNKREVJINGSSENTRAL OG GJELDSORDNINGSLOVEN

1.1

Lån som er permanent overførte til Statens innkrevjingssentral, er omfatta av vilkåra i lov om frivillig og tvungen gjeldsordning for privatpersoner (gjeldsordningsloven) av 17. juli 1992. Utdanningsgjeld til staten skal behandlast på linje med anna gjeld som har tilsvarande sikringsgrad.

1.1.1

Statens innkrevjingssentral kan gå inn i forhandlingar om gjeldssanering etter denne loven når namsretten har opna gjeldsforhandlingar.

1.2

Når namsretten har opna gjeldsforhandlingar, skal låntakaren ha betalingsutsetjing etter § 3-4 i gjeldsordningsloven.

1.3

Etter at ein gjeldsordningsperiode som er heimla i gjeldsordningsloven, er fullført i samsvar med ei avtalt frivillig gjeldsordning eller ei rettsavgjerd om tvungen gjeldsordning, kan restgjelda bli ettergitt heilt eller delvis.

2 UTANRETTSLEG GJELDSORDNING FOR LÅN SOM ER OVERFØRTE PERMANENT TIL STATENS INNKREVJINGSSENTRAL

2.1

Statens innkrevjingssentral kan delta i gjeldsordningar utanfor gjeldsordningsloven når Lånekassen har overført fordringa permanent til staten, jf. lov 26. april 1985 nr. 21 om utdanningsstøtte til elever og studenter, § 8 siste ledd.

2.2

Ein førespurnad om gjeldsordning utanfor gjeldsordningsloven blir rekna som framsett når skyldnaren eller medhjelparen hans har sendt eit grunngitt forslag til Statens innkrevjingssentral. Førespurnaden skal innehalde opplysningar om inntekta, formuen, gjelda og levekostnadene til skyldnaren og opplysningar om ektefelle, sambuar, talet på barn og anna som kan vere viktig for saka. Reglane i gjeldsordningsloven gjeld som utfyllande regelverk.

2.3

Innanfor gjeldsordningsperioden skal det bli teke omsyn til sannsynlege endringar, mellom anna endringar i gjeld, inntekt, utdanning og omsorgsplikter. Tilsvarande skal det takast omsyn til om skyldnaren er arbeidsufør eller langvarig sjuk, eller om det finst andre omstende som det er grunn til å rekne med kan påverke betalingsevna.

2.4

Etter at ein utanrettsleg gjeldsordningsperiode er fullført i samsvar med den gjeldsordninga som er avtalt, kan restgjelda bli ettergitt heilt eller delvis.

3 BETALINGSVILKÅR FOR LÅN SOM ER OVERFØRTE PERMANENT TIL STATENS INNKREVJINGSSENTRAL

3.1

Fordringar som blir permanent overførte til Statens innkrevjingssentral, får lagt til renter etter den rentesatsen som blir fastsett for lån i Lånekassen. Sjå kap. VI, pkt. 2.1. Lån i Lånekassen blir forrenta etter renta på statssertifikat som har frå null til tre månader igjen til innløysing. I tillegg kjem ein prosent p.a. til delvis dekning av administrasjonskostnader og tap. Renta blir fastsett for kvart kvartal av Lånekassen. Mellom observasjonsperioden og verknadsperioden er det eit kvartal. Renta blir belasta på etterskott den siste datoen i kvar månad. Det blir rekna ein prosent høgre rente enn ordinært av heile lånet frå den datoen fordringa er overført.

3.1.1

Det blir rekna rentesrente etter den rentesatsen som gjeld. I 2003 blir ubetalte renter sette renteberande 15. mai og 15. november. For låntakarar som har lån frå før 1. juli 1985, blir det ikkje rekna renter av rentegjeld som er opparbeidd før 1. januar 1990.

3.2

Ei innbetaling dekkjer i denne rekkjefølgja: inkassoomkostningar, gebyr, renter og lån.

3.3

For Statens innkrevjingssentral gjeld lov om tvangsfullbyrdelse og midlertidig sikring, mellom anna gjeld saksbehandlings- og klagereglane i loven. Statens innkrevjingssentral kan inngå frivillige betalingsordningar og gjere vedtak om tvungne nedbetalingsordningar.

3.4

Manglande betalingsevne, til dømes fordi låntakaren har blitt ufør, kan vere grunnlag for ettergiving dersom låntakaren ikkje har tilstrekkeleg til livsopphald til seg sjølv og husstanden sin etter kapittel 2 i dekningsloven.

3.5

Døyr låntakaren, blir gjelda ettergitt.