Matkrig, fred og ro
Det er like sikkert som hundemøkk om våren. Ein skokk drittungar
marsjerar gjennom gatene og hamrar laus på trommene sine som
om det skulle stå om livet. Like sikkert kjem det klager frå
studentane, og dei planlegg meir eller mindre kreative motaksjonar
som aldri blir gjennomført. Eg veit at eg har veldig få med
meg når eg skriv dette, men: Kvar laurdag når eg ser Nordnæs
Bataillon stå opplina ved eksersisplassen sin og ventar, mens
snuten tauar vekk dusinvis av bilar, må eg glise for meg sjølv.
Det er noko herlig kjeklete og opsternasig over det heile
- og dei vaksne er med på det! Ingenting var så kjekt i barndomen,
som når dei vaksne ville vere med og leike.
I den vesle Spanske byen Bunyol i Valencia, har dei kvar
haust ein stor tomatfestival. Den går i korte trekk ut på
at dei lempar 125 tonn solmodne tomatar ut i gatene, mjukare
og søtare enn du nokon sinne har sett i hyllene på Kiwi. I
pur livsglede kastar hordar av Bunyolarar seg ut i ein gigantisk
tomatkrig, saman med 27.000 tilreisande festløver frå heile
verda. Dei kjem eins ærend til byen for å grise rundt i tomathavet.
Etter vel to timars kamphandlingar kjem brannvesenet og spylar
by og krigsherrar reine. Og så går alle dryppande våte mot
byens barar og cafear for å skryte av strategi og militære
bravader. Kva har dette med Bergen sine larmande buekorps
å gjere?Paralellen er åpenbar. Begge er omstridne tradisjonar
som skaper liv og røre. Begge er friske innspel frå folkesjela,
og motstykke til TV-kveld med Grandis. Tørrpinnane er imot
det sjølvsagt, men tørrpinnane er alltid imot slikt.
Studentane, som likar å sjå på seg sjølve som rabulistar
og forsvararar av det personlege initiativ, endar sjølv opp
som mørkemenn. Knusktørt gravalvor og borgarleg snusfornuft
frå ende til annan. Medan buekorpsa trommar på Skansen, sit
skaren av lesehestar med øyrene på stilk på motsett side av
byen og prøvar å skjelne trommelyd gjennom traffikkstøyen
utanfor. I Spania fins det heilt sikkert også nokre surpompar
som vil ha slutt på svineriet, og ser på tomatkrigen som ei
kostbar og meiningslaus forstyrring av fred og ro. Dei meiner
nok at ein burde bruke pengane på barnehageplassar i staden.
Men kva er det som er så gøy med det?
10.04.02
|
