Ein feil frå Universitetet har ført til fleire brot
på garantien om ledige hyblar til utanlandske studentar,
og hybelkapasiteten er sprengt. Utanlandske studentar
fortvilar over å bli tilbydd flatseng på sovesal framfor
eigen hybel.
Madrasser på kantiner og lesesalar har møtt mange utanlandske
studentar som har flytta til Bergen denne hausten. Dei
nærmaste vekene står nærmare 50 utvekslingsstudentar i
fare for å oppleve det same. Dette til tross for at Universitetet
har sendt brev til dei fleste av desse, der dei blir garantert
ein stad å bu.
– Universitetet har gitt nesten 330 utvekslingsstudentar
tilbod om studieplass, men har berre reservert 260 hyblar
hos SiB. Vi har klart å skaffe 20 ekstra hyblar dei siste
vekene, men no er alt fullt. Eg tør ikkje tenke på kva
som skjer om det kjem ytterlegare 50 fleire studentar,
seier ein frustrert Ivar H. Henriksen, direktør for studentbustadane
hos SiB.
Prøver sjølv å skaffe hybel
Det er Kontor for utanlandske studentar ved Universitetet
som har ansvaret for å skaffe hyblar til dei utanlandske
studentane. Henriksen meiner kontoret har gjort eit dårleg
handverk i forhold til garantien om ledige hyblar, og
stiller seg uforståande til at ein har reservert så få
hyblar hos SiB. Han fortel om fortvila studentar som har
blitt nøydd til å sove på dei SiB-tilsette sitt lunsjrom
og på ein lesesal på Fantoft studentby. Brit Kalsnes,
leiar for Kontor for utanlandske studentar, har ingen
sikre tal på kor mange fleire utvekslingsstudentar som
kjem til Bergen dei nærmaste vekene. Ho meiner noko av
grunnen til den uheldige situasjonen skuldast auka pågang
frå utanlandske studentar. Ein er dessutan på førehand
ikkje sikre på kor mange studentar som kjem, fordi mange
søkjer utan å ta imot studieplassen. Kalsnes fortel at
ein jobbar på spreng for å finne alternativ til hyblar
hos SiB.
– Vi jobbar med å finne hyblar på den private marknaden.
Nokre få har og prøvd å skaffe hyblar på eiga hand, fortel
Brit Kalsnes.
– Ahmed slit hos private
Kjersti Moe, internasjonalt ansvarleg hos Norsk Studentunion
(NSU) i Bergen, meiner det er uhaldbart at studentar må
liggje på sovesal, og at det er spesielt ille om dette
rammar utvekslingsstudentane. Ho er kritisk til at Kontor
for utanlandske studentar har bestilt for få hyblar.
– Universitetet veit kor mange som har søkt seg til Bergen,
og burde ha reservert hyblar til alle desse. Så fekk heller
dei hyblane som eventuelt blei ståande ledig bli leigd
ut til norske studentar. No risikerer ein faktisk at utvekslingsstudentane
sjølv må skaffe ein stad å bu. Heiter du Ahmed og ikkje
snakkar norsk kan det bli eit slit å komme inn på den
private marknaden, meiner Kjersti Moe.
