Undervisningskutt?
Ikkje tale om!
Som eit slag i trynet eller ein ekstremt dårleg spøk. Slik
må det ha kjentest ut for kunnskapshungrige studentar på samanliknande
politikk (Sam.pol) ved Universitetet i Bergen, som får null
undervisning fram mot eksamen i mellomfagstillegget.
Var det dette politikarane hadde i tankane då dei innførte
kvalitetsreforma? Å kutte i undervisningstilbodet, og la enno
meir bli opp til studentane sjølv? Sam.pol. instituttet brukar
reforma som eit påskott for å kutte undervisninga. Målsetjinga
om nærmare oppfylgjing av kvar enkelt student får seg eit
kraftig skot i baugen. Reformskuta seglar vidare, men fleire
isfjell er i sikte: Også på mellomfagstillegget i sosiologi
har det denne hausten blitt kutta i forelesningane. Tjue undervisningstimar
er liksom alt som skal til for å kunne ta eksamen.
Studentane tar det likevel med ei forbløffande grad av ro
og fatning. Sjølv om sinnet boblar hos enkelte, blir det ikkje
opprør. At såpass mange finn seg i å bli salderingspostar
på Universitetet sine budsjett fortel vel eigentleg litt om
kor små vi studentar kjenner oss i kamp mot det store Universitetstrollet.
«Det nyttar ikkje likevel», seier mange og med ganske god
grunn. Å gje opp er likevel langt frå løysinga.
«Gjer di plikt, krev din rett» var eit av slagorda då kvalitetsreforma
var vedtatt. Det er viktig at studentane krev rettane sine
no. Det er no reforma er fersk. Det er no vi har sjansen til
å yte press for å få den kvaliteten vi har blitt lova. Derfor
må ingen finne seg i å få kutt i undervisninga. Dei viktigaste
slaga står i møtet mellom studentane og dei tilsette på institutta.
På forelesningar, på instituttkontora og i seminar- eller
kollokviegruppene. Slå tilbake!
Åge Avedal
Er tilknytta Studvest sin nyhenderedaksjon
28.08.02
|
