– Eg måtte ringe Gaia for å sjekke om det eg las var
sant, seier Kjersti Roman oppgitt. Ho skulle bestille
nye busskort til seg og mannen sin, då det viste seg at
rabatten var teken vekk for studentar over 30 år.
 |
Diskriminert. - Det er merkeleg at det offentlege
tillet seg å drive aldersdiskriminering når Universitetet
ikkje gjer det, seier Kjersti Roman.
|
- Det er mange grunnar til at folk fortsatt er studentar
etter at ein er fylt 30, seier Roman. Det kan vere sjukdom,
fødsler eller andre ting. Sjølv er Kjersti Roman 32 år,
utdanna økonom, og har mann og tre barn. Etter ei tid
med jobbing og barn studerer ho no administrasjons- og
organisasjonsvitenskap for å oppdatere seg i forhold til
seinare jobb.
– Det er nødvendig for å fylgje med i utviklinga, seier
ho. Mannen hennar er og over 30 år og går på tannlegestudiet.
6400 kroner i ekstrautgifter
Paret bur på Nesttun og er difor avhengige av buss.
– Det er rart at det offentlege driv aldersdiskriminering
når Universitetet ikkje gjer det, sukkar ho. Det er jo
fullt lov å studere etter at du er 30.
– Kva konsekvensar vil dette få for dykk?
– Det veit eg ikkje enno. I verste fall må ein av oss
slutte studia. Det føles ikkje rettferdig. Men med familie
og studielån har ein ikkje god råd frå før. På ti månader
vert det 6400 kroner ekstra utgifter for mannen min og
meg. Det merkast i ein elles trang økonomi. Ein har ikkje
betre råd om ein er ein 30 år gammal student enn om ein
er 28.
– Dårleg vurderingsgrunnlag
Kjersti er spesielt overraska over den tvilsame handsaminga
som ho meiner har gått føre seg i fylkeskommunen.
– Då eg kontakta dei viste det seg at dei ikkje hadde
oversikt over kor mange dette ville gjelde, og heller
ikkje kva økonomiske konsekvensar det ville føre med seg.
Det verkar rett og slett lite gjennomtenkt. Korleis kan
ein ta ei beslutning på eit slikt grunnlag? Dessutan kan
fylkeskommunen sjølv bestemme korleis ein forheld seg
til mange av statens påleggingar. Dette verkar som eit
dårleg stykke arbeid både av stat og fylke, seier Roman.
Ferdig når ein er 30?
– Men flest studentar er jo under 30, og desse har
fått eit betre tilbod. Ein bør kanskje vere ferdig å studere
når ein er 30?
– Det finst mange lange studier, og det er som sagt ulike
grunnar til at ein fortsatt er student då. Eg trur det
er få som slentrar planlaust omkring når ein er 30, ein
har stort sett ein seriøs plan med det ein gjer då, seier
ho.
– Dessutan, om det er få studentar over 30, er det vel
ikkje noko å bråke med? Alle treng heller ikkje busskort.
Det burde vere i staten og fylkeskommunen si interesse
at kompetansen i folket aukar, og at ein har dei same
rettigheiter som andre studentar og etter fylte 30 år,
seier Kjersti Roman.
– Regelen burde bli teken opp til ny vurdering, der ein
har bakgrunnsinformasjon om det ein skal fatte vedtak
om, og det gjeld både på stat og fylkesplan, avslutter
ho.
Har skapt reaksjonar
Reaksjonane mot rabattomlegginga gjer at departementet
vurderer dei nye reglane. Eit svar er venta denne eller
neste veke.
Stat og fylkeskommune har ikkje same oppfatning omkring
studentrabatt-saka.
– Vi må forhalde oss til dei bestemmelsane som staten
har pålagt oss, og dei har vi fulgt lojalt opp, seier
Rolf Rosenlund, som er nestleder i samferdselsseksjonen
i Bergen fylkeskommune. Dette har Alfred Bjørlo, politisk
rådgiver i Samferdselsdepartementet, ikkje forståing for.
– Dette er deira eiga avgjerdsle, og den er ganske merkeleg,
i og med at det burde vere meir midlar til studentrabattar
no etter at staten har bevilga 4,5 milllionar kroner til
bussrabatt. Desse pengane har dei ikkje fått før, seier
han.
- Fylkeskommunen bløffar
- Det er ikkje sant at Hordaland Fylkeskommune er pålagt
å kutte rabatten for studentar over 30. Det er deira eiga
avgjerdsle, noko anna er bløff frå deira side, seier Alfred
Bjørlo.
– Men kvifor gjev de ikkje pålegg om at alle studentar
skal ha rabatt? Då seier de indirekte at de synast at
studentar over 30 ikkje skal ha rabattar?
– Nei, bakgrunnen for at dette vart vedteke i Stortinget
var at ein vil skape positive transportvaner for unge
menneske, og gjerne utsette kjøpet av den fyrste bilen.
Men til sjuande og sist er det fylkeskommunen som bestemmer
om dei vil gje rabatt for studentar over 30 år, seier
Alfred Bjørlo. Jørn Ryssdal, som er 1.konsulent og saksbehandlar
i samferdselskomiteen, vil ikkje kommentere ytterlegare
dei nye reglane og det som eventuelt vil skje med dei.
– Eg kan bekrefte at vi har fått henvendelsar frå studentar
og studentorganisasjonar som tykkjer dette er urettferdig.
Vi arbeider med eit svar til desse som enno ikkje er ferdig.
Før det vil eg ikkje seie noko om korleis reaksjonen blir,
seier Ryssdal. Svaret vert mest sannsynleg ferdig i løpet
av dei nærmaste dagane.
