Virtuell studiekvardag
Tenk om du ikkje hadde trengt å bevege deg ut av senga for
å gå på førelesing. På Institutt for medievitskap er dette
meir enn ein framtidsvisjon.
 |
Havana neste. Studentane på Master of Philosophy in
Screenwriting har hatt nettundervisning med filmstudentar
på Cuba.
|
Kor ofte har du ikkje stått som ein hutrande idiot på ei
busslomme klokka 07.30, og lurt på kvifor du eigentleg driv
på med denne studeringa? Ikkje alle førelesingar gjeng føre
seg i overfylte auditorium dampande av svette og våte regnklede.
Studentane på Master of Philosophy in Screenwriring har undervisning
på Cuba i tillegg til dei vanlege førelesingane i Bergen.
Dette gjeng føre seg i eit virituelt klasserom på nettet.
Interaktivt skulebygg
Programmet dei brukar heiter MOO som står for multi-user domains,
object-oriented, og er eit virituelt skulebygg med klasserom,
kontor og grupperom. Der kan studentar, undervisnigspersonell
og andre interesserte møtest for å vere med på forelesingar,
kollokvier, studiegrupper og liknande. I prinsippet kan ein
sitje kvar som helst i heile verda og vere med. Systemet vart
først utvikla med tanke på fjernstudium i språk, men vert
no prøvd ut på nye område.
– MOO er utvikla her ved Universitetet i Bergen, forklarer
førsteamanuensis Kathrine Goodnow. Ho har vore med på å lage
dette programmet som dei no brukar til klasseromsundervising
over internett. MOO er nesten heilt tekstbasert. I prinsippet
består det av mange chat-grupper som er sett i system, og
ein flyttar seg mellom dei ved hjelp av navigasjonstastar.
Til saman utgjer desse gruppene noko som kan likne på ei skulebygning
på nettet. Du går inn på heimesida, og vips så er du på ein
interaktiv skule. Først kjem du inn i ein lobby. Der kan du
velge mellom forskjellige klasserom og vere med på undervisninga
som gjeng føre seg der. Dei har til og med lagt inn høve til
å skulke førelesingane og heller gå i ein student-bar. Og
skulle du kome for seint til undervisninga, så er ikkje alt
håp ute, for førelesingane vert tekne opp på band, så du når
som helst kan gå inn og sjå alt som vart sagt.
– Det at systemet er tekstbasert, gjer at ein ikkje treng
kraftige maskiner og breidband for å bruke MOO, fortel Goodnow.
Livleg debatt
Studvest vart med Terje Andersen og Kathrine Goodnow på nettet.
Kvar fredag har filmstudentane obligatorisk undervisning saman
med filmstudentane på Cuba. Denne fredagen er temaet eit essay
som Terje har skrive om Blaxploitation og framstillinga av
svarte i amerikansk film. Diskusjonen går livleg. Sjølv om
cubanarane har litt problem med nettet sitt, ser det meste
ut til å fungere fint. Alle som er der inne kan vi sjå som
små figurar med namn på. Når vi klikkar på dei, kjem det opp
ein liten presentasjon som dei har skrive om seg sjølv. Studentane
avsluttar seansen med å slå av «bandopptakaren». Før dei går
heim helsar dei og snakkar litt saman uformelt. Ein av cubanarane
fortel at ein professor på skulen der er sjuk, og det er svært
vanskeleg å få tak i medisinane han treng. Berre ein slik
ting som sprøyter er nesten umogeleg å oppdrive. Dei snakkar
litt om dette, og dei norske lovar å sjå kva dei kan gjere.
Dersom du har lyst til å freiste MOO sjølv, kan du gå inn
på http://cmc.hf.uib.no:8000.
Viva Cuba!
Det er ein oppstemt gjeng vi møter på SV-fakultetet nokre
dagar før avreise. Om kort tid kan studentane slenge støvlar
og polvottar lengst inn i skapet, og leite fram kortbuksene.
I fire veker skal dei rave rundt i solsteiken på Cuba, med
digre kamera på skuldrane. Sidan i sommar, har filmstudentane
på Institutt for medievitskap hatt felles undervisning med
filmskulen International Film and Television School of San
Antonio de la Baños på Cuba. No skal dei reise over til Cuba
og ha undervisning med dei på eit litt meir fysisk plan. Skulen
er ein av dei mest prestisjetunge filmskulane i verda, og
den vart grunnlagd av mellom andre Gabriel Garcia Marquez.
Namn som Coppola, Redford og Spielberg spøker i gangane. Dei
som reiser frå Noreg er tolv studentar og to lærarar.
– Vi gler oss sjølvsagt til å reise til Cuba, og til å gå
på ein så prestisjetung skule, fortel dei smilande. Studentane
frå Noreg skal ikkje berre liggje på stranda. Dei skal også
vere med på Havana Film Festival.
– Korleis føler de ellers at den web-baserte undervisninga
har fungert?
– Ganske godt eigentleg. Sjølv om det har vist seg å fungere
best for små grupper. Når det er for mange inne på ei gruppe
vert det lett uoversiktleg, forklarer dei. Ellers skal dei
gjere ein del praktiske øvingar og skyte nokre små prosjekt
saman med dei cubanske studentane.
- Og undervisninga går på spansk?
- Nei, på engelsk heldigvis.
Avreisedato er 16. november.
13.11.02
|
