Simsala sirkus
Heile hausten har
barn frå flyktningmottaket Vestlandsheimen og nabo-skulane
trena på sirkus- kunstar. No er det på tide å vise dei
til mor og far.
 |
KLOVN I TAKET. Klovnen Frantix, alias sirkuslærar
Chris Liengaard, haustar beundrande blikk frå sirkusbarna.
|
Haukås musikkhus, måndag klokka 16.50: Tjue
barn spring rundt og rundt på det glatte golvet i musikkhuset
på Breistein, Åsane. Dei slåss om merksemda. Alle likar
å posere. Alle er frampå. Alle skal om ein liten time
opp på scena i sirkusskulens avslutningsshow, for å vise
fram kva slags kunstar dei har lært denne hausten. Nokre
skal sjonglere, andre skal turne og stå på stylter, nokre
skal vere slangemenneske, tilsynelatande utan bein i kroppen.
Gjennom heile hausten har barna møtt kvar måndag for å
lære sirkuskunstar, leike og ete kjeks og saft. Barna
kjem frå flyktningmottaket Vestlandsheimen og fire skular
i nærleiken, og leiarane er studentar ved UiB og NHH.
 |
STYRING. Klovnen Torhild sjefar. F.v. Guro Falck
Olsen, Torhild Eide Pedersen og sirkuselev Ingrid
Renate.
|
Tryllekunst og kråkestup
– Skal eg vise deg ein tryllekunst? spør tiåringen Christian.
Han vil vise korleis han kan trylle fram eit kronestykke
ved hjelp av ei artig, grøn leike som følgde med cornflakes-pakken.
– Sjå, ingenting her, sant? Christian vender på leiken
og gir den eit klask. Triumferande opnar han leika og,
jøss, tar fram ein splitter ny mynt.
– Denne skal eg vise på showet i dag, seier han, og gler
seg til å vise kunstane til mamma. Men fyrst må alt lagast
klart til showet. Stolar skal settast utover, bord berast,
kostymer flyttast, barn skal aktiviserast. Som om dei
ikkje var aktiviserte nok der dei virrar forventningsfulle
rundt. Nechirvan, også han 10 år, er blant dei som ikkje
virrar rundt. Han sit på scena og held eit visst overblikk
med salen. På showet, kan han fortelje, skal han gå på
stylter og stupe kråke. Det blir bra, seier han, som til
vanleg bur på Vestlandsheimen med mor og far.
– Kva er det som er kjekt her?
– Alt, for vi gjer på så masse. Og vi har vore på hyttetur,
den var kjempegøy, fortel Nechirvan.
|
 |
ARILD FÅR DIPLOM. Alle får bestått på sirkusskulen.
Arild får gratulasjonar av lærar Frantix.
|
| |
 |
| |
FINN EIN STOL. Før eit show kan bli eit show,
må publikum få stolar å sitje på. Det er ei oppgåve
Torhild Eide Pedersen og Nechirvan tar alvorleg.
Begge to.
|
| |
 |
| |
PÅ MED DEI. Med litt hjelp frå Jeanett Ann Goodwin
får Christian på seg styltene. Even (i midten) er
mest opptatt av å kikke på.
|
Pausemat
Klokka 17.15: Det er siste samling før framsyninga,
og planlegginga av kvelden er i full gong. Popkorn blir
poppa i store mengder, men akk, mengdene skal ikkje fortærast
før i pausen. Og den er det lenge til.
– Kan du gå på stylter Ingrid Renate, lurer Guro Falck
Olsen. Til vanleg er ho sosiologistudent ved UiB, men
no sjef for sirkuselevane. Fire stykk skal stå på stylter
i sketsjen der leiarane omsider skal få ta del i barnas
gleder. Barna skal opp på stylter og vere dei vaksne og
ansvarlege, medan leiarane får tøyse på nett som dei vil.
Andleta til leiarane avslører at dette er noko dei ser
fram til. Det er så vidt tid til ein siste sjekk på glansnummeret
– verdas største menneskjetårn. Dei fyrste besteforeldra
har allereie samla seg utanfor, i det 20 barn mellom ti
og tolv marsjerer opp på scena. Christian, for sin del,
er fornøgd med å ha fått rana til seg popkorn saman med
kameraten Arild.
Møteplass
– Vi vil at barna på flyktningmottaket og i områda rundt
skal tilbringe meir tid saman utanfor skulen, seier NHH-student
Torhild Eide Pedersen, på showet kjend som den snille
klovnen Torhild. Sirkusskulen er arrangert av organisasjonen
Children’s International Summer Villages (CISV). Kvar
sommar arrangerer dei ei aktivitetsveke for barn frå flyktningmottak
og skular, og sirkusskulen vart eit naturleg framhald.
Målsettinga er å auke samhaldet mellom barna og få dei
til å akseptere kvarandre.
– Halvparten av ungane kjem frå Vestlandsheimen, der dei
bur med foreldra sine. Fleire folk frå heimen har og vore
lærarar, seier Eide Pedersen. Men etter at fleire av dei
måtte slutte, har sirkusskulen hyrt inn ein profesjonell
klovn som sirkuslærar. Chris Liengaard, alias klovnen
Frantix, lærer gjerne vekk sjonglering, sykling på einhjulssykkel
og klovneri til sirkusbarna.
– Mange barneaktivitetar har konkurranse i seg. Dette
er meint å berre vere moro, seier briten Liengaard med
sminka og kostymet til Frantix.
– Som lærar her får eg brukt av heile repertoaret, slik
at det blir veldig lærerikt også for meg. It’s hard work,
but in a different way, you see.
Det ender med grining
Klokka 17.50: Øvinga er over. Alt av foreldre og
filletanter som er å oppdrive kjem inn i salen. Du ser
det i auga deira. Dei kjem inn, scannar lokalet etter
sin håpefulle, og kan nøgd konstatere at jo, jammen er
ikkje auge- steinen der. Og medan fars videokamera kjem
opp og småstressa leiarar fiksar dei siste detaljane,
blir presset for stort for ein tiåring. I barndomen endar
det alltid med grining. Men med litt trøyst frå mor går
det over. Dette går bra. Snart vinkar han til mor i salen.
Inne på omkledningsrommet tar alle på seg dei raraste
gevantar. Klovnar vandrar forbi som den naturlegaste sak.
Vel, det er det jo. Dei er då sirkusbarn. Alt er normalt
for sirkusbarn.
– Skal vi starte no, ropar eitt av dei.
Marsj mot scena
Klokka 18.10: Anført av klovnen Torhild marsjerer
20 barn stolt opp på scena til trampeklapp frå salen.
I neonlyset lagar sirkuset eit mennesketårn og briljerer
med litt akrobatikk. Tilskodarane er med. Aldri har vel
barn og vaksne støya så mykje i lag. Etterpå skal kvar
og ein opp og vise fram eit lite triks. Det er no Christian
skal trylle for mamma og dei andre. Han forsikrar seg
om at kelloggs-leika er med opp på scena. Men alt kan
ikkje gå som planlagt. Musikken er høg, og det var ikkje
blant tinga Christian hadde tenkt på.
– Eg gjorde noko anna i staden for. Eg vifta med denne,
eg, seier Christian og viser fram si rytmisk sportsgymnastikk-inspirerte
flygekule. Sirkuselevane viser dei tøffaste kunstar på
scena. Ein liten fyr går i spagaten som om han aldri har
gjort noko anna, andre tar saltomortale eller triksar
med diablo.
Popkorn på Arild
Klokka 18.50: Pausetid, altså det same som popkorntid.
Arild får omsider litt av popkornet. Christian er for
opptatt med å servere til å ete, der han spankulerer rundt
på stylter, berande på brett med popkorn for å spandere
på tilskodarane. Malin skulle også gå på stylter, men
vart gåande på sokkelesten med pausematen.
– Sirkus er veldig artig. Eg skal vere med neste år også,
eg, seier 11-og-eit-halvt-åringen. Showet går sin gang.
Meir akrobatikk, sykling på einhjulssykkel og ikkje minst
klovnen Frantix får salen til å boble. Og når Frantix
som ekstranummer heng etter beina i taket, er sirkusbarna
i hundre. Dei har funne sitt store idol, langt større
enn kva sjølvaste TV2 kan tenkast å frambringe til våren.
Alltid med
Til slutt er det diplomtid. På denne skulen får alle bestått.
Alle får klem av den snille klovnen Torhild. Vestlandsheimen
takkar for initiativet frå CISV, leiarar takkar, publikum
klappar framleis begeistra.
– Vi håpar at alle vil vere med til neste år, avsluttar
Guro Falck Olsen. Reaksjonen er spontan frå eitt av sirkusbarna.
– Sælfølgeli!
