På tur med Carl
– Kven der? spør dama bak tryggingslenka, og peikar på fotografen med ei dobbeltløpa hagle.
– Øhh.. Hei, seier vi.
– Vi kjem frå Leikestoveredaksjonen. Fotografen er så nervøs at han ristar.
– Journalistar altså, seier ho, og vi høyrer eit lite klikk i det ho løyser sikringa på hagla.
– Ikkje frå Klassekampen eller Aftenposten eller noko anna seriøst drit vel?
– Neida, vi kjem frå VG eller Se og Hør eller noko slikt, lyg vi. Hagleløpet vert senka, og eit stivt smil breier seg over ansiktet.
– Skal de lage heime-hos-reportasje, kanskje?
– Nei vi skulle berre snakke litt med Carl.
– Carl kan ikkje vere med å leike, han er hjå dokteren med knekt nase. Det er den tosken Victor sin feil..
– Victor...?
– Ja, han kasta stein på døra vår og ropte at han skulle banke Carl, men Carl sa at han ikkje vil slost med slike gamlisar. Så sa Victor noko om mora til Carl, og Carl sa at dama til Victor var feit. Men då sparka Victor i framskjermen på bilen vår, som vi akkurat har lakka opp att etter den episoden i slottstrappa, og drylte ei torv i veggen. Eg gjekk ut og prøvde å få han frå det, men då lugga han meg, og då tok Carl heilt av. Han storma ut av huset og lugga Victor, medan Victor kneip Carl på innsida av låret. Det var heilt forferdeleg, Carl fekk store blåmerker.
– Kva skjedde så?
– Så kom Jan Petersen og storebror til Victor. Dei hadde gøymt seg bak garasjen, men dei kom ikkje så langt for Victor kom uforvarande til å sparke Jan i skrittet i all tumulten, og Carl skalla ned broren til Victor så han blødde naseblod.
– Kvar er dei no då?
– Victor forstua foten då han trakka ned i eit hol i blomsterbeddet der ein Dagbladet-fotograf hadde gøymt seg. Jan trur eg ligg der bak huset endå.

 

Orsaking

Etter at mange har klaga på kryssorda i dei to siste nummera av Leikestove, har vi bestemt oss for å tilsetje kryssordansvarleg att. Vi vonar at de no igjen vil verte fornøgde med kryssorda, og sende inn mange nye løysingar. Denne veka har vi ikkje fått inn nokon rette svar, men det vert høve til å sende inn løysingar på både kryssordet denne veka og førre veke til neste nummer. Vi trykker difor eit av løysingsforslaga til kryssordet i nr. 28. Innsendaren kan gle seg til ei overrasking i posten. Løysinga på kryssordet førre veke var MERINOSEU, og vi orsakar skrivefeilen.

Siste artikkel:
3. september 2003
Antall artikler: 42

Kollektivrabatten