Norgga stáhta oahppoloatnakássa
Go Norgga beali studeanttat studerejit ollesáiggi dahje bealleáiggi Sámi
allaskuvllas, de sis lea vuoigatvuohta ohcat oahppodoarjaga Stáhta
loatnakássas. Oahppodoarjaga sáhttá ohcat neahta bokte dahje Sis-Finnmárkku
studeantaovttastusa bokte. Stáhta loatnakássa ohcanáigemearit leat 15.11
čakčalohkanbadjái ja 15.03 giđđalohkanbadjái. Eambbo dieđut:
www.lanekassen.no.
Norgga stáhta oahppoloatnakássa sáhttá addit stipeandda ja loana Ruošša ja
eará Gaska- ja Nuorta-Eurohpa ja ovddidanriikkaid studeanttaide.
Oahppoprográmma galgá dábálaččat leat dohkkehuvvon oahppun, man vuođul lea
vuoigatvuohta oažžut doarjaga Stáhta oahppoloatnakássas. Doarjaga sáhttá
oažžut njealji jahkái. Dieđuid oaččut Sámi allaskuvlla oahppohálddahusas.
Ruoŧa ja Suoma studeanttat sáhttet ohcat oahppodoarjaga ruovtturiikkas.
Jus lea registrerejuvvon ja orron Norggas guhkit áigái, de lea vejolaš ohcat
loana ja stipeandda Norgga stáhta oahppoloatnakássas. Oahppohálddahus sáhttá
veahkehit studeanttaid oahpporuhtadanohcamušain iežaset ruovtturiikii.
Ruoŧas: Centrala studiestödsnämnden, CSN:
www.csn.se, Suomas: KELA,
www.kela.fi.
Norgga sámediggi lea ásahan stipeandaortnega vissis fágasurggiin sámi
fágabargiid váste. Sámediggi almmuha stipeanddaid jahkásaččat. Eambbo
dieđuid gávnnat www.samediggi.no.
Juohke nuppi jagi lea vejolaš ohcat stipeandda Seminarii Lapponici -foanddas. Foandda ulbmilin lea addit ruhtadoarjaga studeanttaide, geat lohket sámegiela oahpaheaddjeoahpu oassin. Sámi allaskuvla hálddaša foandda. Boahtte háve Seminarii Lapponici –stipeanda juolluduvvo oahppojagi 2007/2008, ja dan sáhttet ohcat sii geat lohket sámegiela oahpaheaddjeoahpu lassin. Ruovttusiidui bohtet eambbo dieđut dán birra.