Eit folk av sytarar
Kva er gale med oss nordmenn? Har vi nokon gong hatt ein
betre levestandard enn vi har no? Det er berre å tenke etter
og sjå rundt seg. Nordmenn ligg på verdstoppen om ein reknar
i bruttonasjonalprodukt per innbyggar. Likevel klagar og syt
vi over kor vanskeleg det er å leve i Noreg, med høge renter
på lån, høge matvareprisar, urimelege prisar på alkohol og
ikkje minst vanvittige straumprisar. Sjølvsagt finst det grupper
i samfunnet som verkeleg har grunn til å vere misfornøgde
med høge prisar og trange levekår. Grupper som burde fått
litt meir av samfunnskaka. Det er heller ikkje desse gruppene
eg vil angripe i denne kommentaren. Det er den gjennomsnittlege
rike nordmann med si syting og misnøye som provoserer meg.
Korleis kan i verdssamanheng styrtrike nordmenn tillate seg
å klage over at pengane ikkje strekk til? Vi har ein materiell
standard og eit forbruk som saknar sidestykke. Vågar vi å
sjå litt forbi vår eigen navle, oppdagar vi kanskje verda
slik ho er. Med all sin urett og med ujamn fordeling. Når
eg klagar over stigande prisar på elektrisitet manglar eg
fullstendig perspektiv på verda. Når du syt over høge renter
eller dyr leigepris for hybelen, lever du i di eiga trange
livsverd, i skylappland.
Media er kanskje den viktigaste eksponenten for nordmenn
si misnøye, og Studvest er langt i frå noko unntak. Det er
trist når tallause spaltemetrar i avisene blir fylt med ugrunna
klaging, og når fjernsyn og radio gir folket av sytarar ein
så sentral plass. Det er likevel eg og du som må ta eit oppgjer
med våre eigne haldningar. Dette er eit spark til både meg
sjølv og andre. Neste gong vi kjenner oss misfornøgde med
privatøkonomien kan det vere ein idé å tenke seg om to gonger
før vi startar sytinga.
Åge Avedal
Er tilknytta Studvest sin nyhenderedaksjon
22.01.03
|
