Horoskop for 2003

Etter gjentatte oppmodingar har vi eit gjensyn med astrologi her på bakerste side. Studvest gir deg ditt horoskop for vårsemesteret 2003.

Du vil byrje semesteret med mykje pågangsmot og svært gode planar for det faglege opplegget. Dei første vekene får du med deg det meste av undervisinga, men dårleg vêr i byrjinga av februar vil imidlertid gjere at du vert forhindra i å møte på mange av forelesingane. Du vil då hamne litt etter dei andre på faget, men ikkje verre enn at du meiner du kan greie å lese deg inn att. Under ein ny periode med dårleg vêr i mars vil du finne ut at det er betre for eg å lese heime. Sjølv om dette gjekk dårleg i fjor, trur du at det no skal gå betre. Men uventa mykje tid gjeng med til å sortere og katalogisere CDane dine alfabetisk, og å finne ut kva som eigentleg er på alle dei umerka videokassettane. Neste gong du er på forelesing skriv læraren ein bokstav på tavla som du aldri har sett før i heile ditt liv. Siste del av april vil Bergen oppleve ei heitebølge som varer ut mai. Alle jentene i heile byen vil i dette tidsromet sole seg topplause i parken. Diverre vil du opphalde deg på lesesalen krampeaktig bøygd over ei bok. På eksamen vil du likevel synes at det ikkje gjeng så aller verst. Men i gangen utanfor eksamenslokalet vil du møte ein mann med stålbriller. Han fortel deg at han har fått anna svar enn deg på alle oppgåvene, og han vil syne deg notatar som kan indikere at han har rett. I det du kjem ut skyar det over, og vi vil få ei lenger periode med mykje nedbør og ein del vind. Det var alt for denne gong.

 

Elles har vi registrert sidan sist at:

– Av grunnar ukjende for oss har radiokanalen P4 hatt ein drastisk auke i andelen barneprogrogram, nyheiter på samisk og fokusering på utkant-Noreg, dei siste vekene.

– Skandalejournalist Gerhard Helskog gjer alt for å kome tilbake i varmen. Sist observert i baksetet på ein svart Cadillac saman med Vazelina Bilopphøggers.

– Det ikkje skal svært mykje til for å kuppe valet i Velferdstinget. Vi gratulerer Bustadaksjonen som har flytta inn vegg i vegg med Studvest-redaksjonen.

– Torgeir Stensrud og Trond G. Kristoffersen i Finance Credit har forklart oss at grunnen til milliardunderskotet var dei store catering- utgiftene dei hadde.

– Kjelder som vi ikkje kan avsløre, har fortalt oss at noko av grunnen til at det gjekk så dårleg med firmaet, var at Stensrud og Kristoffersen skal ha spist opp rekneskapsføraren sin.

Ukas tegneserie (Francois Picot)

Kvalitets-
reformen

Siste artikkel:
2. oktober 2002
Antall artikler: 20

Boligsituasjonen