 |
Tek sjølvkritikk: Christian Meyer ved Historiske
institutt vedgår at informasjonen kan bli betre, men
etterlyser samstundes betre arbeidsinnsats hjå studentane.
|
– Eg har vore på førelesingane, kollokvier, levert mappeoppgåver
og ikkje minst lest mykje. Det seier Jon Spence, ein av
mange som strauk til eksamen i historie. Han meiner han
har arbeidd så mykje som ein kan forvente, og legg dårlege
førelesingar og marginale eksamensoppgåver til grunn for
stryk-raset. I delfaget HIS101, som er eit oversiktstudie
i eldre historie, er strykprosenten på 44,2 prosent. Av
dei som stod på eksamen, har 31,3 prosent oppnådd karakterar
mellom 3,0 og 3,9.
– Vi er overraska over den høge strykprosenten, men fekk
utover haustsemesteret mistanke om at ein del studentar
kom til å møte veggen. Det seier professor Christian Meyer,
leiar i undervisningskomitéen ved historisk institutt.
Lukka og arrogant
Spence meiner særleg dei eldre førelesarane kan verke umotiverte.
– I eitt tilfelle kom det faktisk til krangel mellom førelesar
og studentar, fortel Spence. Studentane skal ha anklaga
førelesaren for å gå langt utanom pensum. Meyer stadfestar
ovanfor Studvest at instituttet frå fagutvalet har motteke
formell klage på ein førelesar.
– Vi har òg fått klage på eksamen frå ein student. Klagene
vil verte handsama i tråd med gjeldande regelverk internt
ved instituttet, seier Meyer. Historiestudenten reagerer
også på at ei av eksamensoppgåvene berre var omfatta av
ei enkel førelesing og 20 sider i pensum. No fryktar Spence
at mange tar skrekken og hoppar av studiet.
– Eg vil understreke at dette ikkje er meint å vere ein
hevneaksjon frå mi side, men eg oppfattar historisk institutt,
med nokre unntak, som ein lukka og arrogant institusjon,
avsluttar Spence.
Tek sjølvkritikk
Historie grunnfag vart i haust lagt om i tråd med innføringa
av kvalitetsreforma. Meyer legg ikkje skjul på at dei har
møtt utfordringar. Instituttet tek sjølvkritikk for dårleg
informasjon kring innføringa av reforma. Den nye modulen
krev ei langt større arbeidsmengde frå studentane. Medan
ein tidlegare kunne «gamble» på eksamensoppgåvene, er dei
nye eksamenane meir finmaska. Meyer meiner studentkulturen
er ei av årsakene til den høge srtykprosenten.
– Når eg føreles frå klokka åtte om morgonen uteblir ein
tredel. Mange studentar tek ikkje studia alvorleg nok, meiner
Meyer. Han er derimot optimistisk med tanke på vårsemesteret.
– Dersom kvalitetsreforma skal fungere, må strykprosenten
ned. Instituttet leverer langt fleire førelesingar enn tidlegare,
reforma gjev betre oppfølging av studentane, og innføringa
av mappeoppgåver har vore vellukka, seier Meyer.
