Ord til trøyst
Hei! Då er vi igang med første Studvest for haustsemesteret.
Velkommen til byen hvis du er ny student, vi skal nok få det
fint saman. Alle dykk andre er vi sjølvsagt glade for å sjå
igjen, og vi i Studvest ser fram til å framleis å vere dykkar
faste følgesvenn i studiekvardagen. Men denne leiaren er mest
til deg som er ny.
Sidan vi har vore her ei stund kan vi kanskje kome med nokre
nyttige erfaringar. Hvis du nettopp har flytta ut heimanfrå,
så er det i følge dei som har greie på det, ein av dei mest
stressande hendingane du opplever i livet. Så det er ingen
som synes det er teit hvis du synes livet er kjipt innimellom.
Men det kjem til å gå seg til. Det gjer det alltid. Og dersom
du treng nokon å snakke med men ikkje har det, så ikkje ver
redd for å ta kontakt med nokon som har greie på slikt. Det
har tusenvis av studentar gjort før deg, og det er heilt ok.
Sjølv om det er deilig å flytte ut heimanfrå, så ring pappa
eller mamma av og til. Det får deg til å føle deg mykje betre.
For dei som har vore med på fadderveker og liknande håper
vi at du møtte nye interessante menneske som på sitt vis vil
gi deg eit haldepunkt i det nye livet ditt i Bergen. Dersom
du hamna på ei skikkeleg kjip gruppe, eller ikkje var med
i det heile, så berre ta det med ro. Det vil dukke opp nokon
ganske snart. Ikkje la deg skremme. Det går heilt fint. Slapp
av.
Prøv å finn nokre studentorganisasjonar som er samanfallande
med dine interesser, test ut eit par av dei, og til slutt
vil valget falle på den eller dei du likar best. Og for all
del ikkje prøv å overbevise andre om at du har kontrollen
ved å sjå tøff og beinhard ut. For det første får du ingen
vennar på det viset, og for det andre er det ingenting som
er så lett å spotte som ein fersk student som deg. Det er
heilt sant. Det beste er å vere deg sjølv.
Forhåpentlegvis har du det fint allereie, og har byrja å
snuse på alt som går føre seg i denne vidunderlege byen som
heiter Bergen.
Her i redaksjonen har vi framleis hjernene i ferie-modus,
men hjula har omsider byrja å snurre. Vi håper at du vil finne
Studvest nyttig og interessant. Husk at det er di avis, for
det er du som har betalt for den. Når journalistane berre
kjem seg opp av campingstolane og igjen får lagt ansiktet
i alvorlege foldar, er dei veldig interessert i å vite kva
akkurat du synes bør stå i Studvest. La oss få vite det hvis
du har nokre tips om konkrete saker, gode eller dårlege som
hender i studentbyen Bergen. Kanskje er det akkurat di sak
som vert hovudoppslaget i neste nummer.
Frå neste nummer vil vi legge om denne sida slik at kommentaren
får meir plass, og leiaren får ein mindre plass. Vi trur at
avisa sine synspunkt vert betre representert med ei anna utforming.
Ein skal ikkje stikke under ein stol at slike «Sørebø på laurdag»
tekster som vi har hatt til no, stundom reflekterer bladstyraren
sitt, heller enn avisa sitt syn på aktuelle saker. Vi vonar
at den nye profilen vil vere med på å løfte dei viktige sakene
i tydelegare fram i lyset.
Med dette seier vi lykke til. Men husk, det er framleis sommar
ei god stund til, sjølv om alle gjer sitt beste for å inbille
deg noko anna. Dette skal bli eit bra semester.
Helsing Bladstyraren.
22.08.03
|
