Play that country music...
Det er to år sidan 11. september. Då vart USA for alvor vekte
opp av den sjølvtilfredse dvalen sin. Dei vart tvinga til
å sjå at dei er ein del av verda likevel, sjølv om dei er
beskytta av store hav mellom seg og land som kan utgjere nokon
reell trussel.
Den jamne innbyggaren i USA har ikkje ord på seg for å vere
særleg interessert i anna enn sitt eige land. Når han refererer
til «The World» meiner han gjerne nettopp USA. I staden for
å forsøke å finne årsaka til dette store hatet mot seg, gjer
USA det motsette: Grev seg ned og sender det dei har av væpna
personell mot nokon som kanskje kan ha hatt noko med terroristane
å gjere, eller i det minste har same hudfarge. Og det er klart;
noko må styresmaktene gjere for å halde på opinionen.
Det er ingen tvil om at terrorangrepa 11. september 2001
forårsaka store menneskelege lidingar. Men USA vil ha resten
av verda til å tru at dette er det viktigaste som har skjedd
i nyare historie. Det er det ikkje. USA har vore, og er framleis,
den direkte årsaka til større menneskeleg liding enn åtaket
på tvillingtårna i New York. Det skulle vere nok å nemne Vietnam,
Iran-Contras og 11. september 1973.
Årsaka til at vi lar oss lure, er at USA er så forbaska flinke
til å marknadsføre seg sjølv. Skjer det noko i USA gjer dei
straks sitt beste for få oss til å tru at dette er det verste
som har skjedd i heile verdshistoria. Og her på berget oppfører
både media og styresmaktene seg som om det verkeleg var tilfelle.
Foren eder!
Øverst på denne sida vil vi framover by vi på eit gjensyn
med Studvest for nokre år sidan. Mest frå 70-talet, tiåret
då samnorsken herja vilt i avisspaltene, Studvestredaktør
Matz Sandemann frå NHH var sjefs-raddis, og folket i Kina
og arbeidarane på Bergen mekaniske verkstad (BMV) var eit
viktig anliggande for studentane i Bergen.
Og medan enkelte har hendene fulle med å bortforklare at
dei støtta Pol Pot og andre torturistar, kan vi andre sjå
tilbake på dette tiåret med ein viss ironi og humor. Velkomen
til Studvests mest blodraude periode.
Suspekte studentar
Det var nytt for oss at studentar og dei parkerte syklane
deira, utgjer slik ein grassat risiko for viktige personar
- til dømes kongen - ved opning av nye forskingsfløyer - til
dømes den på Haukeland.
Dette har forskarar og undervisningspersonell teke konsekvensen
av, og låser seg inn bak tjukke dører med kodelås, så studentane
må bruke e-post for å kome i kontakt med dei. Sjølv med id-kort,
er det aldri godt å vite kva studentane kan finne på.
10.09.03
|
