Leikestoveredaksjonen ynskjer alle våre lesarar vel overstått sumar, og trakkar til med eit nytt semester.

På tur med Terje
Vi er atter ein gong på besøk hjå Terje. Det er søndag kveld, og dagen før dagen så og seie.
– Korleis trur du det går i på valet i morgon, lurer vi.
– Hah! Det dumme valet er nok i boks, det har eg kjent på meg lenge, seier han hånleg. Eg er allereie igang med å førebu takketalen. Den må vere litt tåredryppande, men samstundes morosam. Då går den rett heim hjå både eldre og unge.
– Problemet er å finne desse hersens vitsane. På golvet rundt seg har han Norsk Barneblad, Se og hør og nokre gamle Coctail.
– Vitsane i desse blada er forresten heilt ubrukelege. No er det ironi som slår an hjå dei unge.
– Men..
– Hysj no! Her skal de få høyre litt av talen min så langt: Kjære velgarar. Eg vert nesten på gråten når eg ser den tilliten de alle har vist meg ved å velgje meg til ordførar for ei ny fireårsperiode. Eg tykkjer det er mykje lite kult å vere ordførar i Os... Nåh, kva synes de?
– Trur eigentleg at ironi er på veg ut.
– Hææ..?!! Når skjedde dette, ropar han og kyler ein bunke Coctail i veggen så puppedamene flyg.
– For vel eit år sidan kanskje, seier vi. – Det er pinadø siste gongen eg brukar Thomas Gjertsen som konsulent, det var Carl Ivar sin idé. Neste gong de ser den forvokste frosken, så sei eg har ei høne å plukke med han. Vi lovar å gjere det og går heimover. På trappa møter vi Thomas Gjertsen på veg inn.

---

Dårleg av NRK

– Eg er medlem i MENSA, og tykkjer programmet IQ-testen som dei viser på NRK laurdagskveldane er utruleg teit, seier Abraham Gjardarson på telefonen til leikestove. – Slike program gjer at folk trenar seg opp i slike testar som vi i MENSA brukar til å teste folk i inntakstestane. Då vert det mykje vanskelegare for oss i MENSA å avgjere kven som har rett til å vere med i MENSA. Det talar til vår bakdel med slike program kan all slags idiotar kan krevje å få vere med i MENSA. Vi vil ikkje innfinne oss med at MENSA sin integritet vert svekka på dette viset.

 

Leikestove orsakar

Leikestove har sidan sist fått fleire brev frå lesarar som synest «På tur med Terje» er utruleg teit. Dette tek vi i Leikestoveredaksjonen sjølvkritikk på, og medgir at «På tur med Terje» i førre nummer (nr. 19) var oppspinn frå ende til annan. Både det med kulepennen og den rosa underbuksa. Til vårt forsvar skal det seiast at vi var sure fordi Terje ikkje hadde tid til å møte oss på grunn av valkampen. Men dette er likevel ikkje, som LFU påpeikar, ikkje god nok grunn for å dikte opp eit intervju. Terje har heller ikkje fått sjanse på sitatsjekk på intervjuet, og det tek vi også kritikk på. Leikestoveredaksjonen har i dette tilfellet utvist dårleg journalistisk skjøn og oppført seg barnsleg på andre måtar. Andre klagemål som har kome mot spalten «På tur med Terje», er at den ikkje er morosam, men berre dum. Vi i redaksjonen tek sjølvkritikk på at den ikkje er morosam, og også på det med at den er dum.

Leikestoveredaksjonen 16. september 2003.

Siste artikkel:
3. september 2003
Antall artikler: 42

Kollektivrabatten