Heller kollisjon enn koalisjon
Åtte studentar blei valt inn i Bergen bystyre, frå fem ulike
parti. Det betyr at studentar sit på godt over ti prosent
av plassane i styret som avgjer det meste av bergenspolitikken.
Det er verken sjokkerande få eller mange - det er derimot
ganske velproporsjonert. Studentane utgjer vel ti prosent
av dei som bur i Bergen.
Men betyr det noko for studentar at det sit studentar i bystyret?
Kor mange studenpolitiske saker har dei føregåande drive gjennom
i bystyret? Knapt nokon. Partigrenser fungerer som skylappar
for politikarane. Samarbeid mellom høgre- og venstresida har
vore like upopulært blant unge som ellers.
Det er nok av studentpolitiske saker å gripe tak i. Øvst
på lista er naturleg nok bustadsituasjonen. Sjølv om bustadmangelen
er delvis overdriven, er det ikkje til å feie under teppet
at Bergen har den dårlegast dekning av studentbustadar i landet.
Planane er mange. AUF ynskjer å bygge eit tårn større enn
rådhuset ved Storelungeren. At Arbeiderpartiet ikkje gjekk
til val på den saka, ser ikkje ut til å plage nokon. Høgre
ynskjer at NSB skal reise frå den store tomta si, hundre meter
frå AUF-tårnet, slik at det kan byggast bustadar der. Dei
håpar berre at NSB skal få opp farta. Og FrP, Bergens tredje
største parti, talar like godt med to tunger. FpU-tillitsvald
Håvard Fond Garathun sa til Studvest dagen etter valet at
dei ikkje vil bruke offentlege midlar på bustadbygging. FrPs
stortingsmann Arne Sortevik vil derimot bruke dei same offentlege
midlane til å bygge i Bergen.
Ingen blir einige, ingenting blir gjort. Slik har det vore
på bustadfronten dei siste åra. Åtte studentar i bystyret
- det er ei like stor gruppe som SV har - kan gjere ein felles
innsats for å gje studentsaker prioritet, dersom dei kan klare
å setje seg ned saman. For ein månad sidan stilte Studvest
studentkandidatane til AP og SV spørsmålet om korleis dei
såg på samarbeid på tvers av partigrensene. Og medan AP sin
mann ikkje gjekk av vegen for å prøve noko slikt, var SV si
kvinne tvert om ganske negativ til eit slik forsøk. Det ville
vere for ulike interesser, hevda ho.
Ho kan godt ha rett, men prinsipprytteri fører sjelden fram.
Politikk handlar om å inngå kompromiss. Kanskje ynskjer ikkje
NSB å flytte til Arna med det same. Truleg kjem aldri eit
18-etasjers AUF-tårn opp frå teikneblokka. Med vilje frå bystyre
og Storting kan Bergen i løpet av nokre år få ein anstendig
dekningsgrad av studenthyblar, utan at studentane må vere
prisgitt dagens vilkårlege huseigarar.
Vi kan berre håpe at Harald Victor Hove (H), Christopher
Brun (H), Pål H. Thorsen (Ap), Tina Åsgård (SV), Tone E. W.
Salomonsen (SV), Inger Helgeland (SV), Marte Mjøs Persen (RV)
og Julie Andersland (V) finn tonen saman i rådhuset. Gjer
dei det, blir studentane ei tung politisk gruppering i bystyret.
Bergen er landets nest største studentby. La det skine gjennom
også i bystyret.
24.09.03
|
