Ny klubb for universitetstilsette
Club Fægri; Staden der kvantefysikaren møter snekkaren.
| |
CLUB FÆGRI
|
Den nye klubben ligg i kjellaren i Knut Fægris
Hus i Villaveien 9, og er open torsdagar og fredagar
16:00 til 23:00
|
|
Det er torsdagskveld, og me er på opninga av den nye klubben
for universitetstilsette i Knut Fægris Hus i Villaveien. Eit
ensemble av trommer, trompet, saksofon, kontrabass og banjo
spelar høglydt gladjazz, og rundt om i det vesle, gulmåla
lokalet sit folk og et tapas eller småpratar over ein halvliter.
Universitetet i Bergen har rundt 3000 tilsette, men desse
har tidlegare vore forvist til Grillen eller dei ordinære
kantinene.
– Det har lenge vore eit mål for Universitetet å få til noko
slikt, seier Bjørn Johnsen, direktør i SiB Catering.
– Diskusjonane om akkurat dette lokalet starta i vår, arbeidet
byrja rundt semesterstart, og her er resultatet. Kjellarlokalet
er noko heilt anna enn dei andre kantinene på Høyden. Avrunda
buar på dørene og vindauga, ein liten bar langs eine veggen,
mørke trebord, kunst på veggane; det ligg ei litt sydlandsk
stemning over kjellaren. Ein kan lett sjå for seg svartkledde
professorar med skjegg sitja med kvar sin sigar og diskutera
høgtravande emne over eit glas raudvin, men Johnsen avkreftar.
– Nei, her skal ein sleppa å alltid gå med slips. Ein mister
litt av poenget dersom berre ein bestemt type folk kjem hit.
Dette er ein stad for alle. Det er ikkje så mange her i dag,
men dersom berre to prosent av dei tilsette kjem innom ein
kveld, så er det fullt. Det burde dermed vera gode sjansar
for at klubben vert ein suksess. Men me kjem uansett til å
køyra fram til jol. Skal ein døma etter opningskvelden kjem
nok klubben til å vara mykje lenger enn det. Ei gruppe it-tilsette
som sit inne i røykerommet er iallfall godt nøgde med det
nye tilbodet.
– Me var ein gjeng som brukte å møtast i Grillen etter arbeidstida,
men etter at den vart lagt om til kantine var ikkje det noko
særleg lenger. Dette er mykje betre. I kveld stod til og med
Spildo (ass. universitetsdirektør, journ. anm) i døra og tok
imot. Det gjorde han ikkje på Grillen.
15.10.03
|
