Har lite, får mindre
Det kom som ein skuffelse, men diverre ikkje som ei overrasking
at regjeringa i framlegget til Statsbudsjett ser for seg at
ein skal gi heile studiestipendet som ei slags belønning til
snille jenter og gutar som passar på å lese flittig. Framfor
alt for at folk ikkje skal bruke tid på utanomfaglege aktivitetar.
For det første er ei slik ordning skapt til å sabotere eit
kvart tilløp til kreativitet, nysgjerrigheit og entreprenørånd
hjå studentane.
Dernest kan ein spørje kva sjukelønnsordning Lånekassen har.
Er det nokon der som spør studentane om dei føler utilbørleg
eksamenspress, er utbrende eller har andre udefinerbare plager?
Tredje spørsmål: Kvifor i alle dagar skulle nokon vere så
dumme å ta til å eit studium som er kjent for å vere spesielt
vanskeleg og ha stor strykprosent? På kjemi til dømes, som
i dag har 24 prosent stryk, må ein altså rekne med å tape
fjerdedelen av stipendet kvart semester.
Men sist, og viktigast, er framlegget ein elitistisk, trangsynt
og sosialt skeiv måte å tenke rettferd på. Elitistisk fordi
den er utforma av eliten, av dei flinke, for dei flinke. Trangsynt
av same grunn. Og sosialt skeiv fordi den ekskluderer alle
utanomliggande faktorar som sosial herkomst, oppseding, sosial
klasse, psykiske problem, rikdom og andre faktorar som kanskje
ikkje alltid er lette å måle, men likevel påverkar studieresultata.
Barn av akademikarar får betre karakterar enn barn av folk
med lågare utdanning. Dette har ingenting med intelligens
å gjere. Det er berre eit resultat av at dei som sjølv ikkje
har vore innom akademia ikkje har forutsetnadar for å oppsede
og førebu sine barn på akademisk tenking. Barn av akademikarar
har fått dette inn med morsmelka og har ein gratis billett
framfor andre i form av innstilling, lesevanar, systemtenking
og så vidare.
Eit anna døme som ligg heilt i dagen: Studentar med mindre
pengar må som regel jobbe ekstra om dei skal oppretthalde
ein viss levestandard. Mindre pengar er lik meir jobbing,
er igjen lik mindre tid til studiar, som til slutt er lik,
statistisk sett, lågare karakterar.
Vi finn det passande med eit bibelvers: «Dei som har lite
skal jamvel missa det dei har.» Vi ønskjer regjeringa lukke
til vidare med kvantitetsreformen, medan vi hugsar tilbake
til 2001, då Høgre stritta imot eit identisk forslag som då
vart framsett av Utdanningsminister Trond Giske.
15.10.03
|
