På tur med Terje
Terje har lånt ei datamaskin og sit ved kjøkenbordet og skriv med to fingrar medan han stirrar intenst på tastaturet. Sokken på den eine foten har glidd halvvegs av, og den andre heng att i eine Cherroxen som han har sparka av seg borte ved døra.
– Korleis i helvete får eg store bokstavar på denne driten, ropar han irritert.
- Er det ikkje meininga at vanlege folk skal kunne gjere dette? Vi viser han shift-knappen.
– Brukar du ikkje data på ordførarkontoret då, lurer vi.
– Der berre seier eg til sekretæren min kva eg meiner, og så skriv ho eit brev med store bokstavar og allting. Og ho er kjapp, for stundom må vi skifte meining forbaska fort - ofte fleire gongar i veka, forklarer han. Han ser konsentrert i skjermen medan har ristar opp og ned med høgrefoten, så koppane i oppvaskbenken klirrar.
– Korleis veit de kva de skal meine?
– Pøh, det er enkelt, vi berre sender henne ned til bingoen og til røykehjørnet på ungdomsskulen og og høyrer kva dei som er der synest. Og så gir vi dei litt hasjis for at dei skal holde kjeft om det til dei andre partia... Skal du trykke dette? Skriv tobakk. Nei brus, eg meinte brus, det er i alle fall litt sant, he,he.
– Og så då?
–Så diskuterer vi det i lunsjen, og så sender vi det ut som pressemelding. Men denne veka er ho med Carl til Spania for å sjå på hus, så vi må gjere alt sjøl.
– Kva skriv du no då?
– Lesarbrev til Studvest. Vent litt. De skal de få ta det med til dei sutrekoppane med ein gong, seier han og skriv PRINT med store bokstavar på skjermen.
– Kvar kjem det ut, mumlar han stille, ser bak datamaskina og løftar litt på skjermen.
– Du, vi kan heller få det neste veke. No er det NSU-val og alt veit du.
– Har dei starta opp att, seier Terje overraska og lyser opp.
- Eg visste ikkje at NS hadde ungdomsparti ein gong.

HASJIS: Leikestove har motteke eit klagemål frå Landsforeininga mot narkotika i samband med at vi brukte ordet «Hasjis» i denne utgåva av Leikestove. Bruk av ordet «Hasjis» eller ord som kan samanliknast med «Hasjis» kan føre til auka merksemd om hasjis blant studentar, og gjere at dei kan få lyst til å byrje med hasjis eller aukar forbruket av hasjis, seier dei i klagen. Vi i Leikestove orsakar at vi brukte ordet «Hasjis» i føre nummer. Landsforeininga reknar også med at Framstegspartiet stiller seg bak kritikken, sidan det særleg var eit av deira medlem som var offer for «Hajsis»-bruken. «Vi driter i det», seier FrP i ein komentar.

Annonse
Leikestove ynkjer å stille liste til det komande NSU-valet, og søkjer med dette etter kompetente kandidatar. Vi har ikkje lagt fast programmet enno, men hadde håpt på at søkarane har nokre sterke meiningar. Kriterium: Godt humør. Send søknad til Leikestove.

Siste artikkel:
3. september 2003
Antall artikler: 42

Kollektivrabatten