I statsbudsjettet foreslår regjeringa å gjere opptil
halvparten av skulepengefinansieringa i utlandet om til
lån. Til gjengjeld kan studentane låne eit større beløp
enn dagens stipend.
Får regjeringa det som dei vil, blir 30 prosent av dagens
stipend gjort om til lån for høgare gradsutdanning. For
studentar på lågare grad blir utdanninga finansiert med
50 prosent stipend og 50 prosent lån. I tillegg til denne
støtta, som ligg på 52.320 kroner, skal studentane kunne
låne opptil 50.000 kroner i året til å dekkje skulepengar.
På same tid vil regjeringa fjerne avgrensingane på kva
for utdanningar som gir rett til skulepengefinansiering.
Skal tenkje nytt
Sjølv om større deler av støtta blir gitt som lån, meiner
utdanningsmnister Kristin Clemet dette er ei god ordning
for studentane. Ho trur låneordninga vil motivere fleire
til å velje utradisjonelle studiestader i utlandet.
– Med denne ordninga kan studentar gå på skular med over
100.000 kroner i skulepengar. Tidlegare har studentane
vore nøydde til å ta opp private lån eller stole på foreldra
for å få til dette, seier Clemet. Regjeringa vil også
gje støtte til eit tilretteleggingssemester for studentar
som vil ta utdanning i ikkje-engelskspråklege land. Statssekretær
Bjørn Haugstad i Utdannings- og forskningsdepartementet
trur ordninga får studentar til å studere på andre språk
enn engelsk.
– Mange stader hopar det seg opp med norske studentar,
noko som ikkje fører til internasjonalisering. Ordninga
blir ikkje like bra for studentar som for eksempel vil
til Australia, men det er ei byrde vi kan bære, seier
Haugstad ironisk.
- Verre for dei som slit
Gustav Heiberg er president i Association of Norwegian
Students Abroad (ANSA). Han er ikkje nøgd med at delar
av stipendet blir gjort om til lån.
– Vi er positive til prinsippa i forslaget, men ikkje
låneordninga. Med forslaget kan ein student i utlandet
få opptil 136.000 kroner ekstra i lån. Med tanke på at
målet er sosial utligning, kan dette verke motsett. Vi
vil særleg jobbe for å redusere låneandelen for studentar
på lavere grad, fortel Heiberg.
