Tullingar køyrer buss
«Freaks and weirdos ride the bus», var reklameteksten i ein
av General Motors sine kampanjar i USA for ei tid tilbake.
Det fall ikkje i særleg god jord, og mange folk vart utruleg
sure - slik dei gjerne blir når nokon treff spikaren litt
for godt på hovudet.
GM måtte trekke tilbake den reklamen, men ser vi på vår eigen
situasjon innan offentleg transport i Bergen, forstår vi at
dei hadde heilt rett. For dei av oss som er dumme nok til
å lite på godt vêr, og berre tek bussen når det vert for surt
og kaldt og sykkelen har punktert, kostar det per i dag 46
kroner å kome seg tur - retur skulen. Det er omlag det same
som ein småbil brukar i bensin på same strekninga på ei heil
veke. I tillegg kan ein bilist samkøyre for å gjere det endå
billegare. Og ho kan dessutan ta eit par ærend i sentrum på
veg heim utan at det kostar noko ekstra.
Dersom det verkeleg kostar 46 kroner for Gaia trafikk å frakte
ein hutrande passasjer frå Kalfaret til sentrum og attende,
så er offentleg transport dømt til ein sakte og sutrande død.
Med mindre det offentlege er villege til å støtte kollektivtrafikk
for å redusere biltrafikken i sentrum. Det skal vere billegare,
ikkje dyrare, å sitje ukomfortabelt og trangt på ein buss,
som i tillegg brukar lengre tid, enn å køyre bil.
Den som ikkje har bustaden eller skulen/arbeidsplassen ideelt
plassert, må pårekne ein god del trasking, venting, bytte
av buss, og så bortetter. Bur ein til dømes på Landås og studerer
på NLA eller NHH, er du heldig om du kjem deg frå A til B
på under tre kvarter, oftast tek det lenger tid, og du er
våt når du kjem fram.
Hvis vi søv åtte timar og jobbar/studerer åtte timar av døgnet,
så har vi åtte timar verdifull fritid til overs. Ein skal
vere meir enn gjennomsnittleg idealistisk for å bruke ein
og ein halv time av desse timane på transport. Reknar vi litt
på det ser vi at på eit år vert dette det same som ein kontinuerleg
busstur på nær ein halv månad, eller 41 dagars fritid. Har
du råd til det?
Ettersom haustvêret har sett inn for i år, er det nok fleire
som meiner at General Motors ikkje var heilt ute å køyre med
reklama si, sjølv om dei måtte trekke reklamen sin og bukke
djupt og orsake ovanfor alle busspassasjerane som følte seg
støytt av slik uforskamma ærlegheit.
Ein bussbilett bør koste sju kroner.
Organiseringsglede
«Man skulle tro de gjør dette kun for å få lov til å votere...»,
hørt på SiBs velferdsting, etter at nok et benkeforslag kom
opp til votering.
12.11.03
|
