– Utlever alle studentar til overvakinga
Studentleiar Geir Pollestad meiner UiB neste
gong må gi heile studentmanntalet når overvakingspolitiet
spør. Nå skal saka også takast opp på
Stortinget.
Tekst: ØYVIND LEFDAL EIDSVIK oyvind@studvest.no
Foto: MARTE VIKE ARNESEN marte@studvest.no o
Studvest skreiv i førre veke om at lister
over ikkje-vestlege studentar hadde blitt utlevert til Politiets
tryggingsteneste (PST). Norsk Studentunion (NSU) har reagert
kraftig på praksisen.
– Dette går på truverdet laus for Universitetet
i Bergen. Det gir oss eit negativt rykte, seier Geir Pollestad,
leiar for NSU i Bergen. I følgje han har nyhenda også
nådd studentar i Finland, i tillegg til at svensk tv
har meldt om det.
– UiB skyv lovheimelen framføre seg, i staden
for å vere meir tilbakehaldne, meiner Pollestad. I staden
for å berre levere ut lister over ikkje-vestlege studentar,
burde UiB levert lister over alle studentar til tryggingstenesta,
tykkjer han.
IKKJE LEIKE MED PST
Universitetsdirektør Kåre Rommetveit kan forstå
kritikken frå studentleiaren, og er sjølv tvilande
til kor fornuftig det er av PST å be om slike lister.
– Men å gje lister over alle studentar når
PST spør etter noko anna, går ikkje. Vi kan ikkje
leike med etterretningstenesta heller, seier Rommetveit.
– Frykter du at dette kan skremme studentar frå
å kome til Bergen?
– Nei, det gjer eg ikkje. Og situasjonen er lik for
dei andre norske universiteta, svarar direktør Rommetveit.
STORTINGET TAR AFFÆRE
Kvifor tryggingstenesta ber om namnelister, vil også
bli tema i den skriftlege spørjetimen i Stortinget
neste veke.
– Vi vil spørje om kvifor universiteta tar slike
strøjobbar for PST, seier Senterpartiets Rune Skjælåsen.
Også SV vil stille spørsmål. Ågot
Valle, leiar for tingets kontrollkomité, vil sende
brev til justisministar Odd-Einar Dørum.
– Eg samanliknar dette med det tidlegare DDR. Har ikkje
etterretninga lært av Lund-granskinga? undrar Valle.
Forslaget frå Studentunionen om å levere ut heile
studentmantalet neste gong PST spør, er Valle begeistra
for.
– Verkelig kreativt, og alle er like relevante for
PST. Eit godt forslag, seier Valle, og ber UiB ta det på
alvor.
|
