- Er det verkeleg 9. mai?

– Ein må utnytte dei siste restane av vinteren, det er kjempefint. I dag smør eg med klistervoks, men har gløymt solfaktoren, ler Bjørn Sigvartsen.

Han har framleis ikkje gøymt bort langrennsskia, og er ein av mange som utnyttar at det framleis er skiføre på Sjusjøen. For kuldegrader om natta gjer at maisola kan skue utover kvite vidder 850 meter over havet, sjølv om vi nærmar oss midten av mai.

– Aldri køyrt løyper så seint

Johannes Haukåssveen har køyrt løyper på Sjusjøen i alle år, og har aldri opplevd skiføre så seint.

– Vi brukar å gje oss mot slutten av april, i fjor var det slutt på skiføret skjærtorsdag. I år har det vore både kuldegrader om natta og nysnø etter påske, så det er vel det som er årsaka

– Kor lenge kan du love skiføre?

– Det skal bli bra forhold til og med helga, etter det må vi nok ta det dag for dag.

Hestehoven kan skimte utover snødekte vidder på Sjusjøen.

Foto: Bjørn Opsahl/NRK

Eliten på plass

Det er ikkje berre hobbyløparane som veit å nytte seg av den siste resten av den kvite årstida. Landslaga i skiskyting, kombinert og langrenn er alle på plass på Lillehammer for å gå i løypene på Sjusjøen.

Johannes Haukåssveen fortel at det akkurat nå er om lag 40 centimeter med snø innover i fjellet, og at føret er best på morgonkvisten.

– Det er fint å kunne oppleve kontrasten til våren nede i bygda. Eg har aldri gått på ski så seint på året før, seier Frank Eriksen, før han legg i veg innover Ringsakerfjellet.

Johannes Haukåssveen har aldri køyrt skiløyper så langt utover våren.

Foto: Bjørn Opsahl/NRK