Tørke fører til dårlege avlingar

I Fjærland held bonde Johannes Eggen Mundal på med slåtten. Det har ikkje regna på lenge i Fjærland i Sogn. Lufta rører seg over bakken, graset knitrar når ein går i det. Her er det tørke.

– Graset har slutta å vekse. Her er det heilt tørt og brunt, typisk tørke, seier Mundal.

For bonden i Sogn betyr det dårlegare avlingar.

– Eg har merka på det eg har slege til no, at det er dårlegare avlingar enn i fjor. Kva det blir totalt sett, har eg ikkje oversikta over ennå.

• LES OGSÅ: Manglar fôr - må kvitte seg med dyr
• LES OGSÅ: Framleis skogbrannfare i fylket

En tredel av normalen

MÅTTE VATNE: Johannes Eggen Mundal har måtte vatne for å avgrense skadane. Han veit enno ikkje korleis avlingane blir total sett.

Foto: Ingvild Nave/NRK

Det er tørt over heile det elles så regnrike Vestlandet. Sogn og Fjordane har berre fått ein tredjedel av normal mengde nedbør i juni.

Hordaland har fått knapt halvparten av det som er vanleg. Fleire målestasjonar rapporterer at dei ikkje har hatt så lave tal sidan 1982.

– Far min har drive garden heile livet. Han seier dette må vere den lengste tørkeperioden vi har hatt, seier han.

Mundal har måtte vatne bøane på garden sjølv, for å avgrense skadane frå det tørre vêret.

– Hadde eg ikkje vatna frå tidleg sommar, hadde det vore store område utan avling.

Regn i vente

Stian L. Gundersen ved Vervarslinga på Vestlandet bekreftar Mundal sine mistankar. Det har knapt vore ein tørrare juni i Fjærland.

– Den er førebels på andreplass over lågast målte månadsnedbør for juni.

Men, til helga skal det etterlengta regnet skal kome tilbake til Vestlandet.

– Det er utrygt for nedbør fredag og laurdag. Då er det usikkert om andreplassen vil halde seg. Det ser ut at juni i år vil gå ned på tredjeplass etter helga.

• LES OGSÅ: Her går tidlegpotetene i jorda
• LES OGSÅ: Rekordkrav etter avlingssvikt