Lærarmobbing
Nei og nei. No har det skjedd igjen, melder BT. Ei heil
klasse har blitt kollektivt mobba av læraren sin. Foreldra
har teke affære, og stemna læraren inn for retten. I rettsreferatet
les vi at han hadde kalla heile klassa for tullingar eller
idiotar eller noko i den duren.
Stakkars, stakkars born. Dei kjem nok til å gå gjennom livet
som vrak, og fylle opp mentalinstitusjonane våre. Prøv å sjå
situasjonen for deg. Du er tysklærar for ein gjeng ufordragelege,
kvisete fjortisar med halve ræva hengande ute. Damene på vindusrekka
fekk vikaren til å byrje å grine i førre time, og ein Einstein
bakerst gliser deg så frekt opp i trynet at du umiddelbart
får lyst til å slå han. To månadar i strekk har du prøvd å
lære dei forskjellen på dativ og akkusativ, men utan merkbar
effekt. Er det rart at fyren vart frustrert? Han var vel like
frustrert som min gamle tysklærar var, då han i fortvilelse
utbraut: «Saude! E dokke mindre begava folkens?!» Nokon av
oss såg ned, nokon gliste, men var det nokon som følte seg
mobba? Neppe.
Eg ser det heile klarare no. Utbruddet hans var fullstendig
berettiga. Men prøver du å forklare noko slikt til foreldra,
er eg redd du kjem til kort. Dei er alt for opptekne med å
finne nye måtar å overbevise seg sjølve om at det er alle
andre enn deira eiga skuld, at ungane ber preg av omsorgssvikt.
Men slik er det ikkje.
20.02.02
|
