19. mars skal UiB avgjere om dei vil opprette eit 15-poengs
fag for tillitsvalde i studentorganisasjonar. NSU og Bergen
Rock-aktører meiner dette kan redde organisasjonslivet
når Kvalitetsreformen strammar grepet.
Til hausten set kvalitetsreformen inn, og i nokre studentorganisasjonar
fryktar dei for færre aktive medlemmer.
– For å vere førebudd på arbeidsmengda som kvalitetsreformen
påfører studentane, ynskjer vi å innføre eit organisasjonsfag
som gjer det meir attraktivt og gjennomførbart å ha verv
i studentorganisasjonar, seier Jørgen Wold i Bergen Rock-aktører
(BRAK). Saman med Kjetil Nygård i Studentrådet har han
utarbeida framlegg til UiBs utdanningsutval om oppstart
av 15-poengsmodulen. 19. mars vil Utdanningsutvalet ta
stilling til forslaget. Ifølgje rådgjevar ved Seksjon
for studiekvalitet, Lars Helge Nilsen, ligg det ei klar
interesse i lufta for at eit slikt fagtilbod kan komme
i gang.
– I saksførelegget til utvalet vil ein gå inn for at det
blir sett ned ei gruppe som skal diskutere faginnhald,
relevans og mogleg organisering. Faget kan i så fall bli
starta opp så fort som råd, kan hende alt i 2004, seier
Nilsen.
Teori og praksis
I forslaget er faget delt i ein teoretisk og ein praktisk
del, etter framlegg frå Frank Aarebrot ved Institutt for
samanliknande politikk. Den teoretiske delen ynskjer Wold
og Nygård skal bestå av fellesemne for organisasjonslivet,
slik som enkel rekneskapsføring, leiing, personalhandsaming
og andre relaterte tema.
– I framlegget vårt har vi ynska at dei 15 studiepoenga
skal bli gjevne på grunnlag av ein personleg rapport om
organisasjonsarbeidet, og at karakteren blir bestått eller
ikkje bestått, seier Kjetil Nygård.
|
 |
Ønsker fag. Jørgen Wold og Kjetil Nygård vil ha
fag for tillitsvalde.
|
– Studiepoeng motiverer
– Eit slikt fag er interessant, og vil hjelpe på rekrutteringa,
trur leiar i Bergen Kristelige Studentforbund, Kristine
Botnen. Ho seier at forbundet ikkje har merka at det auka
arbeidspresset har gått ut over medlemstalet. Ambjørg
Reinsnos, leiar i koret Blandede Akademikere, tykkjer
ein poengmessig kompensasjon er snålt.
– Hovudmotivet bør vere at du har lyst til å vere med,
ikkje for å få poeng.
–Kan eit slikt fag føre til fleire poengsvoltne organisasjonsbroilerar?
– Nei, det er eg ikkje redd for, seier Botnen. Jørgen
Wold i BRAK trur spørsmålet kan stillast på hovudet og
at eit slikt fag kan føre til at fleire studentar vil
bli interesserte.
