Kap. I - Hovudreglar
1 STØTTEFORMER OG UTREKNING AV STØTTE
1.1
Hovudformene for støtte frå Lånekassen er lån og utdanningsstipend. Det kan også bli gitt andre stipend.
1.2
Det går fram av kap. II og kap. III korleis støttebeløpet blir utrekna.
1.2.1
Søkjar som tek vidaregåande opplæring som han/ho har rett til etter opplæringslova § 3-1, kan få støtte etter kap. II.
Søkjar som tek anna utdanning, inkludert høgre utdanning, kan få støtte etter kap. III. Dette kapitlet gjeld og for vaksen søkjar som tek grunnskoleopplæring eller vidaregåande opplæring som han/ho har rett til etter opplæringslova § 4A-1 eller § 4A-3.
N
Orientering om opplæringslova § 3-1:
Hovudinnhaldet er at all ungdom mellom 16 år og 19 år har lovfesta rett til tre års vidaregåande opplæring som kan føre fram til studiekompetanse, yrkeskompetanse eller delkompetanse. Dersom opplæringstida varer lenger enn tre år, har eleven rett til å fullføre opplæringa i samsvar med læreplanen.
Søkjar bruker av retten når han/ho går på kurs som følgjer læreplanen for offentlege vidaregåande skolar. Dette inneber at søkjaren også bruker av retten ved private vidaregåande skolar som følgjer slike læreplanar.
Ved omval kan retten bli utvida med eitt år. Ein elev som tek det same året om igjen, får ikkje utvida retten. Søkjar bruker av retten sjølv om han sluttar i nokre fag, eller ikkje får bestått karakter.
Elevar som har rett til spesialundervisning, kan ha rett til vidaregåande opplæring i to år ekstra.
Heile retten må til vanleg takast ut innan fem år etter at grunnskolen er fullført, og innan seks år når opplæringa blir gitt i lærebedrift. For elevar som tek opplæringa på tre år, er det derfor rom for to "venteår" før eller under opplæringa.
N
Søkjar som har rett til vidaregåande opplæring i Noreg, og som tek tilsvarande opplæring i utlandet, får støtte etter reglane i kapittel II.
N
Anna utdanning, inkludert høgre utdanning
"Anna utdanning" er all høgre utdanning og alle kurs som ikkje følgjer læreplanar for offentlege vidaregåande skolar. Dette gjeld mellom anna folkehøgskolar, tekniske fagskolar, bibelskolar, kunstskolar, IT-skolar og ulike private korte yrkesretta utdanningar. Det omfattar også søkjar som går på ein vanleg vidaregåande skole, men som ikkje har rett til opplæringa etter opplæringslova § 3-1.
N
Orientering om opplæringslova § 4A-1:
Dei som er over opplæringspliktig alder, og som treng grunnskoleopplæring, har rett til slik opplæring dersom dei ikkje har rett til vidaregåande opplæring etter § 3-1.
N
Orientering om opplæringslova § 4A-3:
Dei som er fødde før 1. januar 1978, har rett til vidaregåande opplæring dersom dei ikkje har fullført dette frå før.
2 BUFELLESSKAP OG ALDER
2.1
Sambuarar blir behandla som gifte dersom dei har felles barn.
N
Dette gjeld frå og med det semesteret dei får barn.
2.2
Registrerte partnarar blir behandla som gifte.
N
Dette gjeld frå og med det semesteret dei inngår partnarskap.
2.3
Søkjar som har fylt 65 år før 1. januar 2003, kan ikkje få støtte.
Dersom søkjaren blir over 45 år når utdanninga er fullført, skal han få redusert lån, slik at gjelda kan bli betalt tilbake før søkjaren fyller 65 år.
N
Dersom søkjaren har fått betalingsplan tidlegare, blir det teke omsyn til samla gjeld inkludert renter.
N
Låntildelinga skal reduserast slik at gjelda kan bli tilbakebetalt innan søkjaren har fylt 65 år.
For søkjar som er over 45 år når utdanninga er fullført, gjeld desse reglane:
Låntildelinga skal bli redusert slik at gjelda kan bli betalt tilbake før søkjaren fyller 65 år. Heile utdanningsstipendet, inkludert konverteringsdelen, blir halde utanfor når gjelda blir redusert.
Søkjar som er over 45 år ved avslutta utdanning, kan ikkje ha høgre gjeld enn kr 500 000 ved avslutta utdanning. For søkjar som blir over 45 år ved avslutta utdanning, blir gjeldsgrensa redusert med 1/20 av kr 500 000 for kvart år ut over fylte 45 år. Det vil seie at ein søkjar som er 50 år ved avslutta utdanning, kan få inntil 15/20 av kr 500 000, ein søkjar som er 55 år kan få 10/20 osv.
Støtta for året kjem fram ved at Lånekassen trekkjer den utrekna reduksjonen og eventuell tidlegare gjeld (lån og eventuelle renter) frå kr 500 000. Beløpet blir delt på så mange år som står igjen av utdanninga.
3 KVA SLAGS UTDANNING DET KAN BLI GITT STØTTE TIL
3.1
Det kan bli gitt støtte til vidaregåande opplæring og høgre utdanning ved offentlege utdanningsinstitusjonar. Støtte kan også bli gitt til lærlingar som har godkjend lærekontrakt. Til utdanning ved private utdanningsinstitusjonar kan det bli gitt støtte dersom utdanninga tilfredsstiller dei faglege krava som blir stilte i lov av 14. juni 1985 - privatskulelova, §§ 4 og 5, eller dei krava som blir stilte til eksamensrett i lov av 11. juli 1986 - privathøyskoleloven, § 9. Det kan også bli gitt støtte til kompetansegivande utdanning ved studieforbund som er godkjende etter voksenopplæringsloven § 10. Det same gjeld utdanning ved dei frie fjernundervisningsinstitusjonane som er godkjende etter voksenopplæringsloven § 11. Om tilleggskrav til fjernundervisning, sjå punkt 4.4.
3.1.1
Søknad om godkjenning av opplegg ved private institusjonar for rett til utdanningsstøtte til elevar/studentar, blir behandla av Lånekassen i samråd med Utdannings- og forskingsdepartementet.
3.1.2
Det kan bli gitt støtte til ulike førebuande kurs som er lagde opp med repetisjon av fag frå grunnskolen for å gi betre grunnlag for opptak i grunnkurs i vidaregåande opplæring. Vaksne som har rett til grunnskoleopplæring etter opplæringslova § 4A-1, kan få støtte etter kap. III, sjå punkt 1.2.1.
3.1.3
Kva slags utdanning det kan bli gitt støtte til i land utanfor Norden, blir regulert i kap. V. Sjå og kap. I, punkt 8. Om støtte til utdanning i Norden, sjå kap. I, punkt 6 og 7.
3.1.4
Til studieopphald i andre nordiske land under NORDPLUS-ordninga kan det bli gitt støtte etter kap. II og kap. III. Til studieopphald i utlandet etter SOKRATES/ERASMUS-ordninga og til studieopphald gjennom LEONARDO-programmet som varer i minst tre månader, kan det bli gitt støtte etter kap. V.
N
Utanlandsk statsborgar som kan få støtte etter reglane i kap. I punkt 5.3 eller 5.4, kan gis støtte til studieopphald under ERASMUS-ordninga, NORDPLUS-ordninga og LEONARDO-programmet for det tidsrom som gjeld for kvart enkelt opplegg.
N
For at søkjar i ERASMUS-ordninga skal kunne få støtte, er det ein føresetnad at dei har opptak ved ein norsk lærestad, og at ERASMUS-opphaldet gir kompetanse som eit ledd i utdanninga i Noreg.
3.1.5
Når norsk lærestad som har fått høgre utdanning godkjent for støtte etter punkt 3.1, legg heile eller delar av utdanninga til utlandet, kan deltakarane få støtte etter dei reglar og satsar som gjeld for studiar i Noreg.
3.1.6
Det kan bli gitt støtte til berre ei utdanning om gongen.
N
Dette gjeld fulltidsutdanning. Det kan gis støtte til fleire deltidsutdanningar, dersom ei av dei er på minst 50 prosent studiebelastning (opptil 100 prosent).
3.2
Det kan ikkje bli gitt støtte til
- utdanning ved militære skolar
- etatsopplæring eller bedriftsintern opplæring
- ulike opplæringskurs som blir sette i gang av, eller i samråd med, arbeidsmarknadsetaten, når det faglege innhaldet ikkje utgjer fulltids kompetansegivande utdanning som det kan bli gitt støtte til
- utdanning ved flyskolar i utlandet
- doktorgradsstudium i Noreg. Det kan likevel bli gitt støtte til doktorgradsstudium i utlandet og til søkjar som får støtte etter kap. X, punkt 4.3
- utdanning ved lærestader der kostnadene med skolepengar, eksamensavgifter, materiell o.l. er svært høge, dersom det ikkje er særleg behov for utdanninga
N
Opplæringskurs:
Vilkåra for at det faglege innhaldet skal vere i samsvar med anna utdanning som gir rett til støtte, er at
- kurset må tilsvare eit grunnkurs eller eit vidaregåande kurs innanfor ordinær
vidaregåande utdanning
- kurset må føre fram til offentleg eksamen ved avslutta utdanning, og det skal
skrivast ut årskursbevis som svarer til årskursbevis for utdanning med støtterett
N
Godkjende opplegg der skolepengane aukar sterkt, må vurderast på nytt.
3.3
Det blir ikkje gitt støtte til norskopplæring utan i kombinasjon med anna godkjend utdanning.
4 KORLEIS UTDANNINGA MÅ VERE LAGD OPP
4.1
Utdanninga må til vanleg vere lagd opp som reglementert fulltidsutdanning. Utdanning som ikkje er på nivå med høgre utdanning må ha eit undervisningsopplegg på minst 20 timar per veke. Til opplegg i regi av oppfølgingstenesta i fylkeskommunen kan det bli gitt støtte når undervisningsopplegget er på meir enn ein tredel av timetalet for eit kurs.
N
Det kan bli sett bort frå kravet om 20 undervisningstimar per veke for utdanningsopplegg som følgjer offentleg godkjende læreplanar. Eleven si reelle studiebelastning blir lagd til grunn. Sjå nærmare regel til punkt 4.2.
4.2
Det kan bli gitt støtte til deltidsutdanning som omfattar minst 50 prosent av undervisningsopplegget i reglementert fulltidsutdanning. Dersom deltidsutdanninga ikkje blir tilboden som fulltidsutdanning, blir det teke utgangspunkt i krava om talet på undervisningstimar i punkt 4.1. Ved tilbod om komprimert deltidsutdanning kan færre undervisningstimar godtakast, men ikkje under tre timar ved høgre utdanning, lågare grad, eller seks timar for utdanning på nivå under høgre utdanning.
N
Årsblokka i kap. I punkt 10.3 blir ikkje utvida ved deltidsutdanning.
N
Elevar i utdanningsopplegg som følgjer offentleg godkjende læreplanar, og som har ei studiebelastning som er høgre enn undervisningstimetalet tilseier, kan få støtte ut frå studiebelastninga dersom undervisningstimetalet per veke er minst 6 timar (komprimert deltid).
4.2.1
For deltidsutdanning blir støttebeløpet rekna til halvparten, to tredelar eller tre firedelar av støttebeløpet til fulltidsutdanning.
N
Til skolepengar og eventuelt ekstra materiell kan det bli gitt lån for dei faktiske utgiftene, men øvre grense blir sett lik deltidsprosenten av det beløpet som er sett som grense i forskriftene.
4.3
Fulltidsutdanning må vare i minst tre månader. Deltidsutdanning må vare i minst fem månader. Det kan bli gjort unntak når utdanninga har samanheng med yrket eller den tidlegare utdanninga til søkjaren.
4.4
Det kan bli gitt støtte til fjernundervisning som er tilrettelagd som fjernundervisning ved ein norsk lærestad, og som gir godkjend kompetansegivande utdanning. Fjernundervisninga må vere følgd opp av samlingar eller anna form for oppfølging frå lærestaden kvart semester. Utdanning som blir tilboden som fjernundervisning må vere godkjend etter punkt 3.1.
Fjernundervisninga må ha eit omfang som tilsvarer minst 50 prosent av fulltidsopplegg.
N
Dersom søkjaren er i utlandet, blir støtta likevel gitt etter norske satsar.
N
Det blir ikkje gitt reisestipend ved fjernundervisning. Det kan likevel bli gitt reisestipend ved ein kombinasjon av klasseromsundervisning og fjernundervisning, når klasseromsundervisninga er obligatorisk. Sjå kapittel III punkt 8.1.
5 STATSBORGARSKAP
5.1
Søkjaren må vere norsk statsborgar.
N
Dersom søkjaren har endra statsborgarskap sidan forrige søknad, må det dokumenterast.
N
Flyktning/statslaus blir behandla som utanlandsk statsborgar.
5.1.1
EØS-borgar som har sosiale rettar som arbeidstakar i Noreg etter EØS-avtalen, skal ha rett til støtte til utdanning etter dei same reglane som gjeld for norske statsborgarar, i den grad det følgjer av EØS-retten. Det same gjeld barn, ektefelle, partnar etter partnerskapsloven og sambuar med felles barn til slik EØS-borgar.
N
Retten til støtte gjeld EØS-borgar som har status som arbeidstakar i Noreg. Som arbeidstakar blir rekna berre den som har arbeid som hovudmål med opphaldet før han tek til i utdanninga. Deltidsarbeid på minimum 50 prosent blir godteke som tilstrekkeleg til å opparbeide status som arbeidstakar. Eiga næringsverksemd blir godteken som likestilt med eit arbeidsforhold.
Som rettleiande nedre grense for kor lenge arbeidsforholdet i Noreg skal ha vart før utdanninga, er det sett tre månader.
Det er eit krav for å få støtte etter EØS-reglane at det er ein fagleg samanheng mellom arbeidet i Noreg og den utdanninga det blir søkt om støtte til. Det kan også bli gitt støtte til utdanning i samband med omskolering som følgje av ufrivillig arbeidsløyse (oppseiing eller permittering). Det blir gitt støtte til yrkesutdanning i vidaregåande opplæring eller høgre utdanning.
Det blir ikkje stilt krav om samanheng mellom arbeid og utdanning når det gjeld støtte til barn og ektefelle/sambuar/partnar av arbeidstakar frå EØS-land. Barn har rett til støtte etter desse reglane berre når dei ikkje har fylt 21 år og framleis er forsørgde av arbeidstakaren når dei begynner på utdanninga. Men dei vil behalde denne retten også når dei kjem over aldersgrensa 21 år, dersom dei framleis bur i Noreg og har vore i utdanning heile tida.
5.2
Statsborgar frå anna nordisk land får støtte etter dei felles nordiske reglane i punkt 7.
5.3
Det kan bli gjort unntak frå regelen i punkt 5.1 for statsborgar frå land utanfor Norden som tek utdanning i Noreg, og
N
Ved behandling etter kapittel II, søkjar under aldersgrensa: Foreldra sine likningsdata blir nytta dersom dei har vore her så lenge at det kan skaffast. Dersom foreldra har komme til Noreg etter likningsåret, legg vi den noverande inntekta til grunn. Utrekningsmåten i nærmare regel til kapittel II punkt 5.1.1 blir brukt. Dersom det er sannsynleg at foreldra ikkje har inntekt, kan Lånekassen leggje det til grunn.
5.3.1
har komme til landet av politiske eller humanitære grunnar. Søkjaren må ha fått asyl i Noreg eller ha anna form for opphaldsløyve
N
Vedtaksbrevet frå Utlendingsdirektoratet som viser framandrettsleg status, eller kopi av reisebevis, må liggje føre.
N
Søkjar med opphaldsløyve på humanitært grunnlag får støtte etter dette punktet, men kan ikkje få flyktningstipend.
N
Opphaldsløyve kan bli gitt med tidsavgrensing. Dersom opphaldsløyvet går ut i løpet av eit semester, kan støtte bli gitt for heile det semesteret.
N
Asylsøkjarar som ventar på avgjerd, kan ikkje få støtte frå Lånekassen.
N
Søkjar som har fått innvilga asyl, men som framleis bur i asylmottak når søknaden blir send inn, kan ikkje få utbetalt støtte før det ligg føre stadfesting frå mottaket om at søkjaren har flytta ut. Støtte blir gitt berre for dei månadene søkjaren ikkje bur i asylmottak. Sjå punkt 12.3.
5.3.2
har hatt samanhengande fulltidsarbeid i Noreg i minst tolv månader like før skoleåret, og har betalt skatt til Noreg i denne perioden
N
Arbeid på norsk skip blir godteke på linje med arbeid i Noreg.
N
Praktikantarbeid (inkl. au-pair) kan godtakast. Frikort eller registrering som arbeidstakar i arbeidstakarregisteret blir godteke på linje med betalt skatt.
N
Søkjar som har fått støtte til ei utdanning etter tidlegare punkt 5.4.1, opptener ikkje rett til støtte etter punkt 5.3.2.
N
Dersom søkjaren har kombinert deltidsarbeid med f.eks. deltidsutdanning (minst 50 prosent), bør normalt tre år kunne godtakast dersom søkjaren dokumenterer samanhengande opphald i Noreg i denne tida. Vanleg fem vekers ferie blir rekna med. Same treårsgrensa gjeld ved dokumentert arbeidsløyse i Noreg og ved omsorgsarbeid for eigne barn.
5.3.3
har teke utdanning i Noreg dei tre siste åra med tilfredsstillande fagleg framgang utan støtte frå Lånekassen
N
Fullført norskkurs og innføringskurs for framandspråklege elevar tel som del av dei tre åra søkjaren har teke utdanning i Noreg.
5.3.4
er gift med norsk statsborgar, og begge bur i Noreg. Sjå punkt 2.1
N
Søkjar som har fått rett til støtte etter denne regelen, får behalde retten, sjølv om ekteskapet blir oppløyst.
N
Søkjar som er separert frå norsk statsborgar, blir framleis rekna som gift og kan få støtte etter denne regelen.
N
Søkjar som har vore gift med norsk statsborgar tidlegare, blir vurdert etter kap. I punkt 5.3.2 eller 5.3.3. I denne samanhengen blir omsorgsarbeid i heimen sidestilt med fulltidsarbeid. Med omsorgsarbeid meiner vi omsorg for barn under 10 år eller omsorg for uføre eller eldre med pleiebehov i den nærmaste familien.
5.3.5
har fått opphaldsløyve som barn eller barnebarn under 19 år til norsk statsborgar som bur i Noreg og forsørgjer søkjaren
5.3.6
har fått opphaldsløyve som ektefelle til utanlandsk statsborgar eller som barn eller barnebarn under 19 år til utanlandsk statsborgar. Det er eit vilkår at vedkommande forsørgjer søkjaren, har opphalds- og arbeidsløyve, bur i og er skattepliktig til Noreg
6 UTDANNING I EIT ANNA NORDISK LAND
6.1
Til utdanning i eit anna nordisk land blir det gitt støtte etter dei same reglane og kostnadssatsane som gjeld for Noreg. Det er til vanleg eit vilkår at utdanninga har offentleg godkjenning og kjem inn under støtteordninga i studielandet. Det blir ikkje gitt støtte til deltidsutdanning.
N
Det blir i somme tilfelle gitt støtte sjølv om utdanninga ikkje er omfatta av støtteordninga i studielandet. Det gjeld mellom anna danske folkehøgskolar og vidaregåande opplæring på Island.
6.1
Til utdanning i eit anna nordisk land blir det gitt støtte etter dei same reglane og kostnadssatsane som gjeld for Noreg. Det er til vanleg eit vilkår at utdanninga har offentleg godkjenning og kjem inn under støtteordninga i studielandet. Det blir ikkje gitt støtte til deltidsutdanning.
N
Det blir i somme tilfelle gitt støtte sjølv om utdanninga ikkje er omfatta av støtteordninga i studielandet. Det gjeld mellom anna danske folkehøgskolar og vidaregåande opplæring på Island.
6.1
Til utdanning i eit anna nordisk land blir det gitt støtte etter dei same reglane og kostnadssatsane som gjeld for Noreg. Det er til vanleg eit vilkår at utdanninga har offentleg godkjenning og kjem inn under støtteordninga i studielandet. Det blir ikkje gitt støtte til deltidsutdanning.
N
Det blir i somme tilfelle gitt støtte sjølv om utdanninga ikkje er omfatta av støtteordninga i studielandet. Det gjeld mellom anna danske folkehøgskolar og vidaregåande opplæring på Island.
6.1.1
Nordisk statsborgar som kan få støtte etter kap. I, punkt 7 i forskriftene, og statsborgar frå land utanfor Norden som har fått rett til støtte etter kap. I, punkt 8.1, kan få støtte til utdanning i eit anna nordisk land i inntil eitt år. Det er eit vilkår at utdanninga kan godkjennast som ein del av den norske utdanninga som søkjaren er i gang med.
Statsborgar frå land utanfor Norden får ikkje støtte til å ta ei fullstendig fagutdanning i eit anna nordisk land. Sjå likevel kap. I, punkt 5.1.1.
6.1.2
Til førebuande språkkurs i Finland og på Island kan det bli gitt språkstipend etter reglane i kap. V. Sjå kap. V, punkt 8.1.1.
7 FELLES NORDISKE REGLAR
7.1
Til utdanning i eit anna nordisk land kan det til vanleg bli gitt støtte frå støtteordninga i heimlandet.
N
Med «heimlandet» er meint statsborgarlandet.
7.2
Heimlandet avgjer kva for utdanning som gir rett til støtte.
7.3
Ein søkjar som tek utdanning i eit anna nordisk land, kan få støtte frå støtteordninga i studielandet dersom
N
Nordiske statsborgarar som fyller krava for støtte til utdanning i Noreg etter dette punktet eller etter punkt 5.1.1, kan få støtte fra Lånekassen sjølv om dei har rett til støtte frå heimlandet (statsborgarlandet). Det gjeld også sjølv om utdanninga blir teken i heimlandet eller i eit anna nordisk land. Sjølv om søkjaren har rett til støtte frå heimlandet, skal han ikkje visast til å søkje der. Søkjaren kan sjølv avgjere kva land han vil søkje om støtte frå, men kan ikkje få støtte frå to land for same perioden. Har søkjaren begynt med støtte frå ordninga i eitt land, skal han normalt ikkje kunne velje å søkje frå eit anna land undervegs i utdanninga.
7.3.1
søkjaren har vore busett og yrkesaktiv i studielandet i minst 24 månader like før skoleåret. Omsorg for eige barn under 10 år er jamstilt med yrkesaktivitet. Avbrot i yrkesaktiviteten på grunn av militærteneste, sjukdom o.a. kan godkjennast.
N
Søkjar med halv stilling eller meir blir sett på som yrkesaktiv.
N
Av den fastsette tidsramma på 24 månader for yrkesaktivitet blir det godteke inntil tolv månaders registrert arbeidsløyse og/eller arbeidsmarknadstiltak.
7.3.2
søkjaren er under 20 år og har følgt foreldra sine, når dei er busette i studielandet og har varig arbeid der.
N
Dette gjeld også for søkjar over 20 år som kom til landet før han fylte 20 år, og dermed har opparbeidd rettar etter dette punktet.
N
Barn under 20 år av foreldre som er busette i studielandet, har rett til støtte frå støtteordninga i studielandet, sjølv om foreldra har tidsavgrensa arbeid der. Dette gjeld likevel ikkje dersom arbeidet heilt klart er av tilfeldig natur.
N
Søkjar under 20 år med foreldre som er busette i og skattepliktige til studielandet (etter avtale om dobbel skattlegging i nordiske land), har rett til støtte frå støtteordninga i studielandet, sjølv om foreldra arbeider i statsborgarlandet.
7.4
Ekteskap med statsborgar frå studielandet gir ikkje grunnlag for å gjere unntak frå reglane i punkta 7.1, 7.2 og 7.3.
7.4.1
Dersom søkjaren har vore busett i studielandet i 24 månader og er gift med statsborgar frå studielandet, kan det likevel bli gitt støtte frå studielandet.
7.5
Det er eit vilkår for tildeling av støtte at søkjaren ikkje får støtte frå eit anna land samtidig.
N
Norsk eller nordisk statsborgar som har fått støtte etter dei nordiske reglane og brukt opp støtteretten i eit anna nordisk land, kan ikkje få støtte frå Lånekassen i Noreg.
Det skal til vanleg bli gitt støtte berre frå eitt av landa til same utdanning.
8 UTDANNING I LAND UTANFOR NORDEN
8.1
Det kan bli gitt støtte til studieopphald i land utanfor Norden som varer i minst fire veker, og som er godkjent som ein del av ei høgre utdanning som søkjaren har begynt på i Noreg. Søknaden blir behandla etter dei reglar og satsar som gjeld for studium i land utanfor Norden dersom utdanninga fyller krava som er sette i kap. V, punkt 2.1.
N
Dette gjeld også når søkjaren tek hovudutdanninga i eit nordisk land.
N
Ordninga omfattar samanhengande studieopphald, til vanleg lagt opp ved ein lærestad.
N
Studentar som følgjer deltidsutdanning i Noreg, men som tek eit delstudium/praksisopphald som varer i minst fire veker i land utanfor Norden, kan få støtte etter kap. V ut frå den studiebelastninga som utdanningsopplegget i Noreg er godkjent for.
Er opplegget på mindre enn fire veker, kan søkjaren behalde støtta han/ho ville fått dersom han/ho hadde vore i Noreg. Det blir ikkje gitt tillegg for ekstra bukostnader og reise.
N
Utdanningsstøtta som skal dekkje utgifter til livsopphald, skal tilsvare semesterlengda ved den utanlandske lærestaden.
N
Utanlandsk statsborgar kan få støtte etter kap. V i opptil eitt år til feltarbeid, utvekslingsopphald og studieperiodar som i fagplanen er lagde til utlandet.
N
Det kan ikkje bli gitt støtte til praktikantopphald gjennom AIESEC, IASTE eller tilsvarande.
8.1.1
Kurs som varer kortare enn fire veker ved dei norske studiesentra/institutta i York, Caen, Kiel, Aten og Roma, kan godkjennast for tildeling av støtte. Søknaden blir behandla etter kap. III.
N
Studentar som tek studieopphald på under fire veker ved Det norske universitetssenteret i St.Petersburg, kan også få støtte etter denne regelen.
9 KRAV TIL SØKJAREN
9.1
Søkjaren må vere teken opp som elev/student og ha rett til å gå opp til eksamen. Lærlingar må ha godkjend lærekontrakt. Søkjar som tek utdanning i utlandet, må vere på lærestaden.
Dersom søkjaren er lenge borte frå obligatorisk undervisning, kan retten til støtte falle bort.
N
Ved universitets- og høgskoleutdanning der opptakskravet er generell studiekompetanse, må søkjaren ha dette før støtte kan bli gitt. Søkjar som blir teken opp på bakgrunn av realkompetanse, må sende inn stadfesting på opptaket.
N
Med lærestad er meint skolen/universitetet/høgskolen som søkjaren er oppteken ved.
N
Med "lenge borte frå obligatorisk undervisning" er meint ugyldig fråvær på meir enn fire veker (20 skoledagar)per semester, eller fleire korte fråvær som til saman blir meir enn fire veker. Til vanleg bør avkortinga i støtta vere i samsvar med lengda på fråværet.
N
Søkjarar som har fullstendig studiepermisjon i meir enn seks veker, kan ikkje få støtte. Det gjeld eigne reglar for permisjon/fråvær under sjukdom, sjå kap. IV punkt 3, og for søkjar som får barn, sjå kap. IV punkt 2.
9.1.1
Hospitantar kan få støtte når det faglege opplegget gjer det rimeleg.
9.2
Låntakar som har fått ettergitt lån etter reglane i kap. VI, punkt 10, og som søkjer om ny støtte, må sende inn dokumentasjon som viser at helsesituasjonen har betra seg, slik at søkjaren kan gå tilbake til arbeidslivet når utdanninga er gjennomført. Dersom vedtaket er gjort for mindre enn ti år sidan, blir det oppheva når søkjaren får ny støtte.
9.3
Det kan ikkje bli gitt støtte til søkjar som samtidig får støtte frå støtteordninga i eit anna land.
9.4
Søkjar som får eller har fått støtte til eit utdanningsprogram frå NORAD eller andre tilsvarande støtteordningar i Noreg eller i utlandet, kan ikkje få støtte frå Lånekassen. Sjå likevel kap. X, punkt 2.2.
N
Ektefelle til NORAD-stipendiat har ikkje rett til støtte dersom vedkommande har fått opphaldsløyve i eigenskap av ektefelle.
Dei same reglane gjeld også for søkjarar som får støtte frå tilsvarande stipendordningar.
10 KOR LANG TID DET KAN BLI GITT STØTTE
10.1
Det kan bli gitt støtte i normert tid for utdanninga.
N
Ved innspart tid i éi avdeling/eitt fag/lågare grad, kan det bli godteke tilsvarande tidsbruk utover normert tid i ei anna avdeling/eit anna fag/høgare grad, avgrensa oppover til eitt år. Når ein søkjar har teke delar av ei utdanning utan støtte før støtteperioden, kan ikkje det føre til utvida norm for resten av utdanninga.
10.2
Søkjar som tek vidaregåande opplæring som han/ho har rett til etter opplæringslova § 3-1, kan få støtte i så lang tid som søkjaren har denne retten.
N
Sjå nærmare regel til punkt 1.2.1 om hovudinnhaldet i retten.
N
Søkjar som har rett til vidaregåande opplæring i Noreg, og som tek tilsvarande opplæring i utlandet, får støtte etter reglane i kapittel II.
10.3
Det kan bli gitt støtte i opptil åtte år til saman til høgre utdanning, og til all anna utdanning som ikkje er omfatta av opplæringslova § 3-1. Det same gjeld grunnskoleopplæring eller vidaregåande opplæring for vaksen søkjar med rett etter opplæringslova § 4A-1 eller § 4A-3.
Det kan ikkje bli gitt støtte i meir enn åtte år sjølv om søkjaren blir forseinka. Det blir gjort unntak for søkjar som blir forseinka på grunn av sjukdom, på grunn av at han/ho har fått barn i utdanningsperioden, eller på grunn av funksjonshemming.
N
"Utdanning som ikkje er omfatta av opplæringslova § 3-1" er kurs som ikkje følgjer læreplanar for offentlege vidaregåande skolar. Dette gjeld mellom anna folkehøgskolar, tekniske fagskolar, bibelskolar, kunstskolar, IT-skolar og ulike private korte yrkesretta utdanningar. Det omfattar også søkjar som går på ein vanleg vidaregåande skole, men som ikkje har rett til opplæringa etter opplæringslova § 3-1.
N
Vidaregåande opplæring som er teken til og med skoleåret 1985-86 blir ikkje rekna med i åtteårsblokka.
N
All vanleg vidaregåande opplæring som er teken før 2002-03, skal haldast utanfor åtteårsblokka. Dette gjeld for allmennfagleg og yrkesfagleg studieretning, og for opplæring i lærebedrift. Det gjeld uavhengig av om opplæringa er teken med lovfesta rett.
All anna vidaregåande opplæring som er teken før 2002-03, skal telje med i åtteårsblokka. Dette gjeld slik vidaregåande opplæring som frå 2002-03 skal vere omfatta av kapittel III i forskriftene, for eksempel folkehøgskole, teknisk fagskole, bibelskole, kunstskole og private korte yrkesretta utdanningar.
N
Søkjar som er i gang med ei utdanning som han/ho ville fått støtte til etter tidlegare seks- eller åtteårsblokk, kan få støtte til fullføring av utdanninga. Dette gjeld berre i så lang tid som han/ho ville fått etter dei tidlegare reglane om blokkene og om utviding med eitt år på grunn av forseinking. Søkjar som er ferdig med ei utdanning/grad, og som har brukt opp åtteårsblokka i punkt 10.3, får ikkje støtte sjølv om han kunne fått det etter tidlegare reglar.
Det kan bli gjort unntak etter ei særskild vurdering.
N
Det kan bli gitt støtte i meir enn åtte år ved doktorgradsutdanning i utlandet. Det blir lagt vekt på om søkjaren har avslutta høgare utdanning, høgare grad, og på den normerte støttetida for fagkrinsen. Det blir også lagt vekt på om søkjaren får stipend frå andre og treng delfinansiering for å kunne delta i doktorgradsprogrammet.
10.3.1
Det kan ikkje bli gitt støtte i meir enn to år til folkehøgskole.
N
Det blir gitt støtte i berre eitt år til det same kurset ved folkehøgskolar. Forseinking blir ikkje godteke.
10.4
Dei tidsrammene som er fastsette for tildeling av støtte, gjeld berre dersom søkjaren ikkje tidlegare har fått støtte til utdanning frå støtteordningar i eit anna land. Dersom søkjaren har fått slik støtte, skal tidsrammene som er fastsette under punkta 10.2 og 10.3, reduserast tilsvarande det tidsrommet det er gitt støtte frå anna land, og som kjem inn under kvart enkelt punkt.
11 FORSEINKING OG AVBROT
11.1
Når søkjaren har fått utdanningsstøtte for eit undervisningsår, må faglege resultat for dette året kunne dokumenterast.
11.1.1
Dersom utdanninga varer eitt år eller meir og søkjaren blir forseinka, kan det bli gitt støtte i inntil eitt år utover normert tid.
Det blir til vanleg ikkje gitt støtte til forseinking ved deltidsutdanning.
N
Til søkjarar som har lovfesta rett til vidaregåande opplæring, kan det bli gitt støtte uavhengig av fagleg progresjon.
N
Til utdanning som varer i eitt semester, som for eksempel ex.phil. og ex.fac., kan det bli gitt støtte i eitt semester til forseinking, sjølv om den eine delen er bestått.
N
Som eit unntak kan det bli gitt støtte til fagleg forseinking i deltidsutdanning når det ligg føre heilt spesielle grunnar. Grunnar som kan godtakast, er dokumentert sjukdom, eller svangerskap og fødsel som hindrar søkjaren i å ta eksamen til fastsett tid.
Det kan bli gitt støtte til ny fulltidsutdanning til søkjar som er inntil eitt år forseinka i tidlegare deltidsutdanning.
N
Søkjar som må gå om igjen eit år fordi det ikkje er fullført/bestått, får til vanleg full støtte, men ikkje dekning av eventuelle skolepengar. Følgjer søkjaren eit organisert deltidsopplegg ved lærestaden, blir det gitt støtte i samsvar med det faglege programmet.
N
Lånekassen ser bort frå forseinking i all vidaregåande opplæring frå før undervisningsåret 2002-03.
N
Søkjar som har fått støtte til forseinking i begge blokkene etter reglane frå før 2002-03 (støtte til eitt år med forseinking i begge blokkene), kan framleis få støtte sjølv om forseinkinga i den nye åtteårsblokka blir meir enn eitt år.
11.1.2
Ved forseinking i meir enn eitt år kan Lånekassen i særlege tilfelle vurdere å gi støtte. Det gjeld mellom anna funksjonshemma søkjar som har støtte frå folketrygda, søkjar som får barn i utdanningsperioden, og søkjar som har blitt meir enn eitt år forseinka på grunn av sjukdom.
N
For søkjarar som har fått fødselsstipend, kan det bli gitt støtte til forseinking tilsvarande den tida det er gitt fødselsstipend for. For søkjarar som har fått barn, men som ikkje har fått fødselsstipend, må støtte vurderast særskilt.
N
Regelen må bli brukt restriktivt for andre søkjarar. Det skal leggjast vekt på at søkjaren har komme langt i utdanningsprogrammet, og at det er særlege årsaker til forseinkinga.
11.2
Ei utdanning som det er gitt støtte til, blir rekna som avbroten dersom denne utdanninga ikkje er fullført og søkjaren tek til med ei ny utdanning.
Når støtta til den avbrotne utdanninga ikkje er betalt tilbake, skal denne utdanninga telje med i vurderinga av kor mange år det kan bli gitt støtte, jamfør punkt 10.2 og 10.3. Det kan likevel bli gitt støtte utover dette på same vilkår som ved forseinking, sjå punkt 11.1.1 og 11.1.2.
N
Når ein søkjar begynner på ei utdanning og får støtte, og deretter avbryt utdanninga, skal søkjaren behandlast på same måten som ein søkjar som er fagleg forseinka. Det vil seie at dersom søkjaren har fått støtte i meir enn eitt år på tidspunktet for avbrott, så må den tida søkjaren har fått støtte utover eitt år, takast igjen før støtte kan bli gitt til ny utdanning.
N
Ved frivillig tilbakeføring skal lånet annullerast først, og deretter stipenda.
11.3
Søkjar som avbryt ei utdanning før støtta er utbetalt, kan få støtte fram til avbrotet dersom utdanninga har vart i minst tre månader. Søkjar som avbryt utdanninga etter at støtta er utbetalt, kan behalde den støtta som er gitt for tida fram til avbrotet. Sjå også punkta 14.3 og 15.1.
N
Ved utrekninga av for mykje støtte tek vi utgangspunkt i den 15. i den månaden utdanninga blei avbroten.
N
Ved melding om avbrott for søkjarar som får månadleg utbetaling, skal støtta annullerast frå og med førstkommande overføring, saman med eventuell støtte for våren. Rentedatoen blir sett til månaden etter avbrottet.
12 SØKJAR SOM FÅR STØTTE FRÅ OFFENTLEG TRYGDEORDNING O.A.
12.1
Søkjar som får støtte frå offentlege trygdeordningar, får redusert utdanningsstøtte frå Lånekassen. Sjå kap. II punkt 5.6 og 13.2 og kap. III punkt 6.
12.2
Søkjar som tek vidaregåande opplæring som han/ho har rett til etter opplæringslova § 3-1, og som får hjelp til finansiering av attføringstiltak/rehabilitering, eller får utdanningsstøtte frå folketrygda, kan ikkje få reisestipend eller støtte til bøker, materiell og skolepengar frå Lånekassen. Sjå kap. II, punkt 4.3.1 og 8.1.1. Dersom folketrygda yter tilskott til opphaldsutgifter, blir desse utgiftene ikkje dekte av Lånekassen. Dersom folketrygda dekkjer alle utgiftene til skolegangen, kan det ikkje bli gitt stipend etter kap. II, punkt 6.3.1.
N
Det blir ikkje gitt støtte til internatelevar ved dei tidlegare statlege spesialskolane eller ved dei statlege regionale kompetansesentra.
12.3
Søkjar som bur i institusjon og får opphaldet dekt av det offentlege, kan ikkje få utdanningsstøtte frå Lånekassen. Dette gjeld og søkjar som avtener militær eller sivil verneplikt.
12.4
Søkjar som er forsørgd av barnevernet, kan ikkje få utdanningsstøtte frå Lånekassen. Søkjar som er under omsorg av barnevernet, kan få støtte berre dersom det er dokumentert at han/ho bur utanfor fosterheim eller barnevernsinstitusjon, og utgiftene til dette ikkje er dekte fullt ut av kommunen. Vilkåra i kap. II punkt 4.1 gjeld ikkje i slike tilfelle.
13 FORDELING, UTBETALING OG EVENTUELL ANNULLERING AV TILDELT STØTTEBELØP
13.1
Lånekassen fastset korleis støttebeløpet skal fordelast og utbetalast. For søkjarar som tek utdanning i Noreg, blir støttebeløpet til vanleg fordelt med fleire terminar over heile støtteperioden, og terminane blir utbetalte ein gong per månad. For søkjarar som får støtte etter kap. II, inkluderer den første støtteterminen i kvart halvår 10 prosent av støttebeløpet for resten av halvåret, og for søkjarar som får støtte etter kap. III, inkluderer første støttetermin 25 prosent av støttebeløpet for resten av halvåret.
Dersom det blir gitt lån til skolepengar, blir det utbetalt saman med den første støtteterminen kvart halvår. Det same gjeld lån til dekning av ekstra utgifter til materiell.
Dersom det minste ordinære månadsbeløpet til utbetaling er mindre enn
kr 500, blir støtta utbetalt samla kvart halvår.
Ved utdanning i utlandet blir støttebeløpet utbetalt kvart halvår.
N
Dersom søkjaren har månadleg utbetaling, vil også ein tilleggssøknad føre til månadleg utbetaling, sjølv om beløpa er små, jf. kap. II pkt. 8.1.
Dersom søkjaren har fått halvårleg utbetaling, kan han likevel få utbetaling per månad dersom vilkåra for dette blir oppfylte seinare.
13.2
Støttemottakarane får gjeldsbrev/stipendmelding kvart halvår.
Gjeldsbrevet/stipendmeldinga gjeld og som utbetalingspapir for første støtteterminen/halvåret.
13.3
Gjeldsbrevet/stipendmeldinga skal underskrivast av støttemottakaren, og støttebeløpet kan hevast i samsvar med den ordninga Lånekassen fastset. Ved å skrive under erkjenner støttemottakaren ei gjeld som omfattar det som er tildelt som lån for det aktuelle halvåret, i tillegg til eventuelt tidlegare lån.
N
Ved ny tildeling av støtte blir det alltid sendt ut eit nytt utbetalingspapir/gjeldsbrev, som må underskrivast og hevast før dei seinare månadsbeløpa av den nye tildelinga blir overførte.
13.4
Ved månadleg utbetaling blir terminbeløpa for det aktuelle halvåret til vanleg overførte den 15. i kvar månad til den bank- eller postkontoen som støttemottakaren har oppgitt i søknadsblanketten (kontonummer på 11 siffer). For at overføring til konto skal kunne skje, må gjeldsbrevet/stipendmeldinga vere underskriven, heva og motteken i Lånekassen.
N
Endring av kontonummer skal helst skje ved blankett K, eventuelt ved underteikna brev.
N
For søkjarar under 18 år har foreldre/verje rett til å endre kontonummer.
N
Overføringa skjer på forskott kvar månad. Ved behandling seinare i skoleåret kan utbetalingspapiret omfatte støtte for fleire månader.
N
Dersom søknaden blir godkjend den 20. eller seinare i månaden, omfattar utbetalingspapiret også støtta for neste månad.
13.5
Dersom vilkåra for tildelt støtte endrar seg i støtteperioden, kan Lånekassen stoppe utbetalingane for resten av perioden og annullere resttildelinga. Det gjeld mellom anna når støttemottakaren
- avbryt utdanninga og ikkje lenger har rett til støtte
- mislegheld pliktene sine mot Lånekassen, jamfør kap. I, punkt 15.
13.6
Dersom gjeldsbrevet/stipendmeldinga ikkje er returnert til Lånekassen når undervisningsåret/kurset er avslutta, blir løyvinga annullert, og søknaden kan ikkje bli behandla på nytt.
14 OPPLYSNINGSPLIKT
14.1
Søkjaren pliktar å gi rette og fullstendige opplysningar til Lånekassen.
Søkjaren pliktar straks å melde frå om endringar i forhold til det som blei opplyst i søknaden, og om avbrot i utdanninga.
14.2
Lånekassen kan kontrollere at opplysningane frå søkjaren er rette. Lånekassen kan også hente inn opplysningar om søkjaren direkte frå lærestaden, likningskontoret, trygdekontoret og andre etter forskrifter fastsette i samsvar med § 16 i lov av 26. april 1985 nr. 21.
14.3
Dersom nye opplysningar viser at det tildelte støttebeløpet må reduserast, kan Lånekassen gjere om stipend til lån og krevje tilbakebetaling. Sjå også punkt 15.
N
Dersom det har skjedd ei feilbehandling som Lånekassen er skuld i, kan Lånekassen som hovudregel ikkje krevje at utbetalt støtte blir betalt tilbake. Tilbakebetaling kan likevel bli kravd dersom søkjaren heilt klart måtte forstå at han ikkje hadde rett til den tildelte støtta.
15 URETT TILDELT STØTTE/MISLEGHALD
15.1
Dersom ein søkjar har fått utbetalt eller godskrive støtte som forskriftene ikkje gir rett til, kan Lånekassen nekte meir støtte, gjere det stipendet søkjaren ikkje har rett til, om til lån, krevje støttebeløpet tilbakebetalt og rekne renter av lånet i utdanningstida. Heile gjelda kan bli oppsagd.
N
Denne forskrifta skal brukast dersom det ligg føre misleghald av opplysningsplikta. Det ligg føre misleghald av opplysningsplikta dersom søkjaren gir urette eller mangelfulle opplysningar til Lånekassen, eller han/ho ikkje melder frå om endringar som får innverknad på behandlingsresultatet.
N
Vurderinga av reaksjonar i slike tilfelle er skjønnsmessig. Ved vurderinga blir det mellom anna lagt vekt på kor lenge misleghaldet har pågått, om det har skjedd ein eller fleire gonger, og storleiken på beløpet som søkjaren ikkje har rett til. Desse momenta er ikkje uttømmande.
15.2
Ein låntakar som mislegheld pliktene sine mot Lånekassen, kan bli nekta meir støtte, betalingslette etter kap. VI og ettergiving etter kap. VIII og IX. Sjå også kap. I, punkt 14 og kap. VI, punkt 11.3.
N
Låntakarar som tek til i ny fulltidsutdanning med rett til støtte, skal betale terminbeløp som forfell inntil ein månad før den nye utdanninga startar. Ny støtte kan ikkje bli utbetalt før låntakaren har ajourbetalt, eller det er gitt betalingslette etter reglane i kap. VI.
16 UNDERVISNINGSÅR OG KOSTNADSSATSAR
16.1
Det blir gitt støtte for opptil eitt undervisningsår om gongen. Undervisningsåret blir rekna frå den datoen undervisninga startar, og til den datoen undervisninga (inkludert eksamen) sluttar. Støttebeløpet blir til vanleg utrekna på månadsbasis.
I samsvar med kap. I pkt. 10.1 blir det ikkje gitt forlengd støttetid utover normert tid for heile undervisningsopplegg.
Rentedatoen blir sett til 1. februar for studentar som har innlevering av hovudoppgåve eller munnleg avsluttande eksamen i januar. Det er ein føresetnad at søkjaren hadde rett til støtte for haustsemesteret.
Det blir ikkje gitt støtte for haustsemesteret til søkjar som avsluttar utdanninga før 1. september. (Det blir dermed heller ikkje gitt rentefritak for sommarmånadene.) Søkjar som avsluttar utdanninga i september, kan ha rett til støtte for ein månad. Det er eit vilkår at søkjaren ikkje er forseinka utover rammene i kap. I punkt 11.1.1/11.1.2.
16.1.1
Etter søknad kan det bli gitt støtte til utvida undervisningsår når søkjaren har reglementert undervisning, eller når det er dokumentert at søkjaren sparer inn på normert studietid. Opplegget må vare i minst to veker.
Dersom det viser seg seinare at innsparinga ikkje har skjedd, blir dette vurdert som fagleg forseinking.
16.2
Utdanningsstøtta blir rekna ut på grunnlag av satsane som er fastsette i kap. II, III, IV, V og VIII.
16.3
Dei satsane som er fastsette for undervisningsåret 2002-03, gjeld for tida 15. august 2002 - 14. august 2003.
16.4
Satsane i kap. VI og IX gjeld for kalenderåret 2002.
Satsane i kap. VIII gjeld for dei som tek eksamen hausten 2001 og våren 2002.
17 SØKNADSFRISTAR
17.1
Søknad om støtte for hausten 2002 som kjem inn til Lånekassen etter 15. november 2002, blir ikkje behandla.
Søknad om støtte for våren 2003 som kjem inn til Lånekassen etter 15. mars 2003, blir ikkje behandla. Fristen gjeld ikkje for kurs som tek til 1. februar 2003 eller seinare.
N
Søknadsfristen 15. november gjeld ikkje for kurs som tek til 15. oktober eller seinare.
N
Søknader som ikkje er omfatta av søknadsfristen 15. mars:
- Utdanninga har starta 1. februar eller seinare (det gjeld sjølve utdanninga og ikkje om søkjaren eventuelt har starta seint, som følgje av f.eks. verneplikt eller utanlandsopphald).
- Søknaden gjeld støtte til diplomarbeid, sommarkurs, feltarbeid eller liknande som går føre seg heilt eller delvis i sommarferien.
- Søknaden gjeld studieopphald utanfor lærestaden som startar etter 15. mars.
Søknader som ikkje er omfatta av søknadsfristane 15. mars og 15. november:
- Saka gjeld ettertildeling, for eksempel av stipend for tidlegare undervisningsår, der det tidlegare er sendt inn formell søknad, men der Lånekassen har bedt om nærmare opplysningar. Dei manglande opplysningane må vere innsende til Lånekassen same studieåret som dei var tilgjengelege.
- Søkjar som har søkt om støtte i eit anna nordisk land og halde søknadsfristen der.
17.2
Søknader som kjem inn etter at undervisningsåret/kurset er avslutta, blir ikkje behandla.
17.2.1
Dersom søknaden gjeld stipend etter kap. IV, punkt 2 og 3, må søknaden vere innkommen seinast seks månader etter at undervisningsåret/kurset er avslutta.
17.3
Søkjar som er tilskriven/varsla om å sende inn opplysningar, må sende inn desse opplysningane før undervisningsåret/kurset er avslutta for å få søknaden behandla.
17.4
Opplysningar om endringar som kjem inn til Lånekassen etter 15. mars 2003, vil ikkje kunne føre til ny behandling. Sjå likevel kap. II, punkt 15.5.
N
Unnateke frå denne fristen er søkjar som ikkje er omfatta av den generelle søknadsfristen 15. mars, sjå NR til punkt 17.1.
17.5
Dersom det er særlege forhold som gjer at søknadsfristane ikkje kan bli haldne, kan Lånekassen gjere unntak frå fristane.
N
Dersom det oppstår særlege forhold som søkjaren ikkje kunne sjå på førehand, slik som brann, tjuveri e.l., som gjer at skoleåret eller semesteret ikkje kan fullførast utan meir støtte, kan det bli gjort unntak frå søknadsfristen. Dei særlege forholda må vere dokumenterte.