Nyheter

Det er i alle fall målet bak prosjektet Ny eksternweb UiB, som no har fått forskotsvis løyving på 7 millionar kroner frå Universitetsstyret.

UiB tilbyr omfattande informasjon via sine nettsider, men informasjonen har for ein stor del utvikla seg utan heilskapleg styring eller felles rammeverk. Organisering av innhald og redaktøransvar har vore tilfeldig, og nettsidene har vore spreidd på mange ulike serverar og vore publisert med ulikt informasjonsverktøy. Det er bakgrunnen for at prosjektet Ny eksternweb UiB vart etablert i januar 2006.  

Har undersøkt brukarane
No er forprosjektet med brukarundersøkingar og spesifikasjonskrav unnagjort, og ein er klare til å gå i gang med hovudprosjektet. Det er denne delen som no er løyvd finansiering frå styret, sjølv om budsjettet for 2008 enno ikkje er klart.

– Vi har brukt mykje tid på å undersøke kva behov sluttbrukarane våre har, og vi er komne langt i å organisere den informasjonen som skal ligge på nettsidene. Dessutan har vi gjennomført ein anbodsrunde og valt samarbeidspartnar til utvikling av sjølve verktøyet, seier Bodil Kjelstrup, som leier prosjektet.  

Brukarane er i første rekke representert ved dei prioriterte målgruppene potensielle studentar, forskarar i inn- og utland, og det informasjonssøkande allmenne publikum. Ein har jobba mykje med å gjere seg kjend med brukarane og deira behov, mellom anna gjennom intervju. Samstundes er det lagt vekt på å forankre prosjektet i UiB-organisasjonen, gjennom å etablere referansegrupper og utnemne om lag 50 kontaktpersonar som har ansvar for å følgje opp arbeidet i sine einingar. Desse kontaktpersonane har også medverka med verdfull kunnskap om brukarane sine behov sett frå UiB sin ståstad.