Eksamensfilmar og utstyr for rundt 1,4 millionar kroner
kan vere øydelagt etter ein stor vasslekkasje i forrige
veke. Månader av TV-studentane sin produksjon kan vere
tapt.
Torsdag i lunsjtida fløymde rundt 30.000 liter vatn brått
inn i eit av redigeringsromma til TV-faget, som ligg i
kjellaren på SV-bygget. Vatnet kom frå det gamle BT-bygget
der hovudentrepenør Selmer skulle prøvekøyre nokre vassrøyr.
Overingeniør Terje Thue fortel at studentar og ansette
som var til stades i rommet fekk slått av det elektroniske
utstyret, og fekk redda nesten alle dei uerstattelege
råfilmane frå vatnet. Materialet som låg på datamaskinene
er det ingen som førebels veit noko om. Alle datamaskinene
vert no sendt til eit spesialfirma i Oslo, for å prøve
å redde mest mogeleg av det som ligg på harddiskane.
Skulle til festivalen i Grimstad
Materialet som kan vere tapt er eksamensfilmar for grunnfag
og mastergradsstudentar, samt filmar som skulle til Kortfilmfestivalen
i Grimstad. Juan Pacin og Ingse B. Sæthre er begge mastergradsstudentar,
og veit ikkje korleis det har gått med materialet deira.
Ingse sin film skulle til Kortfilmfestivalen, og mangla
berre lydsporet. No må ho kanskje gjere om att to veker
med arbeid. Juan var i redigeringsromet då vatnet kom
fløymande. -Det rann frå veggar og tak, og snarrådige
lærarar er å takke for at vi fekk redda så mykje av materialet
som vi gjorde, seier han. Førsteamanuensis ved institutt
for medievitskap, Katherine Goodnow, seier at ingen enno
veit kven som er hardast råka. Filmane som kan vere tapt
er prosjekt som studentane har jobba med i eit år. - For
mange studentar kan ek-samen verte mykje forseinka, med
dei konsekvensane det igjen har for vidare søking til
andre studier. Nokre av dei utanlandske mastergradsstudentane
må dessutan snart reise frå landet, seier ho. For dei
som skal søke doktorgradsstudium er søknadsfristen 11.
juni.
|
 |
JOBBAR PÅ SPRENG.
- For mange studentar kan eksamen verte mykje forseinka,
med dei konsekvensane det igjen har for vidare søking
til andre studium, seier førsteamanuensis Katherine
Goodnow.
|
Mellombels redigeringslokale
Katherine Goodnow fortel at dei har fått tak i mellombels
lokale til redigering. For å erstatte ein del av utstyret
har dei også kjøpt noko nytt redigeringsutstyr og gjort
nokre investeringar som dei eigentleg ikkje skulle gjere
før til hausten. Men ei fullgod erstatning er det ikkje.
- Sidan det skjedde har vi stort sett jobba på spreng
med å tilrettelegge for studentane og berge mest mogeleg
av utstyret. TV-faget har før vore i vinden fordi det
var på grensa til å verte nedlagt i fjor, då dei ikkje
fekk løyvingar. Men desse skadene får truleg ikkje konsekvensar
for den vidare drifta av faget.
28 mm «nedbør» på ti minutt
Ein tabbe under ombygging av det gamle bygget til
BT er årsaka til vasslekkasjen. Entreprenøren Selmer kan
ha ansvaret.
|
 |
28 MILLIMETER. Brevhaldarane på veggen i kjellaren
på SV-bygget blei grundig vassfyllt under lekkasjen.
|
Overingeniør Terje Thue har rekna ut at redigeringsrommet
til fjernsynsproduksjon må ha hatt ei nedbørsmengde som
tilsvarar 28 millimeter nedbør på ti minutt.
Då Selmer, som er hovudentreprenør i BT-bygget, skulle
prøvekøyre eit nytt røyr-opplegg var det ei kran som ikkje
var stengt. Korleis vatnet har funne vegen inn i SV-bygget
er det ingen som heilt veit, men dei to bygga ligg tildels
innfløkt i kvarandre.
- Vi har lagt opp kilometervis med nye røyr i bygget.
Uhell som dette kan skje, det er difor vi har forsikring,
seier prosjektansvarleg Arve Sande i Selmer Skanska. Han
seier at BT-bygget har fått minimale skader etter uhellet.
Forsikringsselskapet IF held no på å finne ut kven som
har skulda for uhellet. Sannsynlegvis fell ansvaret på
Selmer, men dersom Universitetet får skulda er dei ikkje
forsikra.
