For nye lesarar: Til glede for alle har Leikestove gjenoppstått som Studvest sitt forum for kritikk og debatt. Vi tek opp at suksessen frå 1995, og ber om orsaking for at vi gløymde å introdusere Leikestove i førre nummer. Redaksjonen vonar på mange innspel og stort engasjement frå lesarane.

På tur med Terje
Terje er ein oppteken mann, men han tek seg likevel god tid til å vitje både sin eigen og andre sin valkrins. Vi møtte Terje utanfor Exodus der han stod og synte fram ordførarlekkja si til skodelystne unge.
– Ein må halda seg inne med ungdomen. Slik er det ein kaprar nye velgjarar, seier han og smiler skeivt.
– Det er avgrensa kor mange veljarar ein kan kapra på Madammen på Os, og så driv folk der og spreier rykter om meg. Slik er det ikkje i Bergen.
– Men dei som bur i Bergen kan jo ikkje stemma i Os kommune?
– Nei, det er sant, men det kan jo hende eg kan overtye dei unge om at Os er staden å bu. Eg prøvar å få med meg minst ei eller to jenter heim på nattbussen. Dei er jo den nye veljargenerasjonen, seier Terje og byr oss litt rusbrus.

Student i tiggartrøbbel
– Det gjeld desse tiggarane som poppar opp som paddehattar no som det er vår. Kan ikkje dei ansvarlege politikarane samla desse tiggarane opp i eit hus ute i Arna eller Fyllingsdalen eller noko slikt, så kan dei som ynskjer gje pengar til tiggarane berre reise ut dit? Dermed fjernar ein heile problemstillinga frå Bergen sentrum. Helsing ein urban student.
(BA 10.03. Til nynorsk ved Leikestove.)

Bush i blesten
«I denne krigen vil vi jakte ned alle som hatar Amerika, ein etter ein.» (Washington DC 04.03.03. Til nynorsk ved Leikestove.) Leikestoveredaksjonen vil snart flytte til ei løynd adresse.

101 dagar att til jonsok
Det oppstod lett panikk i førelesingslyden, som var samla i stort auditorium på NHH, då ein av førelesarane kom til å bemerka at det berre er litt over hundre dagar att til jonsok. Studentane på førelesinga har eksamen allereie i mai, og dette vart ein vekkjar for mange av dei. Nokre av jentene byrja å grine og nokre slengde ut usaklege merknadar om hårfestet til førelesaren. Det kom til handgemeng mellom ordensmannen i klassa og nokre av dei andre gutane. Vi i Leikestove vil opplyse alle om at dei fleste av dykk no har langt mindre tid enn 101 dagar til å lese før eksamen.

Kvit slavehandel på Finn.no
VG melder at ei kvinne (25) i Trondheim tilbyr far sin (52) fram på internettsida Finn.no. Ifølgje Volund Balderbrå, professor i Betrevitskap ved Universitetet i Bergen er ikkje dette eit heilt ukjend fenomen.
– Men denne kvinna gjer det uvanleg ope, seier Balderbrå.
– Vanlegvis vert slikt berre gjort via løynde kanalar for spesielt innvidde på verdsveven.

Teit Leikestove
– Eg tykkjer den nye spalta Leikestove er uvanleg teit. Til dømes har den ingen trivelege gissetevlingar der ein kan sende inn svar og vinne ymse Leikestoveeffekter. Til dømes krus. Helsing Henrik frå Herøy!

Framhald i neste nummer.

Kvalitets-
reformen

Siste artikkel:
2. oktober 2002
Antall artikler: 20

Boligsituasjonen