Reglane for neste skoleår er fastsette

Det er få endringar i reglane for stipend og lån for skoleåret 2005-2006. Den største endringa gjeld reisestipendet for alle som ikkje går i vanleg vidaregåande opplæring.

Elevar i vanleg vidaregåande opplæring:

• Det er ingen endringar i satsane for stipend og lån.
• Grunnstipend, læremiddelstipend og forsørgjarstipend skal ikkje lenger bli behovsprøvde mot eiga arbeidsinntekt, eller eigen og eventuell ektefelle/sambuars formue. Lærlinglønn og trygde- og pensjonsytingar får framleis innverknad på stipenda.
• I behovsprøvinga vil det framleis bli teke omsyn til kor mange sysken søkjaren har, men ikkje om syskena er i vidaregåande opplæring eller ikkje, slik det blir i reglane for 2004-2005.
• Det er ingen endringar i reisestipendet (eigendelen blir kr 970, som i år, og det er inga øvre aldersgrense for reisestipendet så lenge du tek vidaregåande opplæring som du har lovfesta rett til).

Elevar og studentar i all anna utdanning:

• Det er ingen endringar i satsane for stipend og lån. Basisstøtta blir framleis 8000 kroner per månad.
• Stipenddelen er framleis 40 prosent av basisstøtta, dersom alle eksamenar blir beståtte og inntekta og formuen ikkje er høgare enn fribeløpa.
• Fribeløpet for inntekt, som er 108 680 kroner i 2005, blir 113 027 kroner i 2006. (Studerer du berre halve året, er fribeløpet høgare.)
• Fribeløpet for trygd, som er 58 150 kroner i 2005, blir 60 476 kroner i 2006. (Studerer du berre halve året, er fribeløpet høgare.)
• Fribeløpet for formue, som er 215 000 kroner for ein einsleg søkjar i 2005, blir 223 600 i 2006.
• Reisestipendet er redusert, slik at tilskottet no blir rekna for to tur-retur-reiser, mot tidlegare tre. Eigendelen er heva frå 1120 kroner til 2010 kroner per undervisningsår.
• Øvre aldersgrense for reisestipend i Noreg er framleis 25 år (berre dei som er fødde i 1980 eller seinare, får reisestipend til reiser i Noreg).
• Utanlandske studentar som har "kvoteplass" ved ein norsk lærestad har til no hatt de samme reglane for reisestipend som andre studentar. Frå hausten 2005 blir aldersgrensa, maksimalbeløpet og eigendelen for reiser i Noreg fjerna for denne gruppa.

Utdanning i utlandet

• Det blir ikkje lenger gitt støtte til utdanning som ikkje kan godkjennast som tilsvarande heile eller ein del av norsk grad, slik det blei gjort tidlegare dersom søkjaren fekk stipend frå andre som dekte minst 30 prosent av kostnadene.
• Forsøksordninga med støtte til søkjarar som er tekne opp i eit utdanningsprogram gjennom eit godkjent samarbeid mellom ein norsk og ein utanlandsk vidaregåande skole, er blitt permanent.
• Det er gjort eit nytt utval av lærestader som er med i ordninga med tilleggsstipend. Utdanning på bachelor-, master- og ph.d-nivå, og delstudium på dei utvalde lærestadene, kan gi rett til tilleggsstipend.
• Det kan bli gitt støtte til tilretteleggingssemester i eit land med det same offisielle språket som fagutdanninga skal takast i, ikkje berre i sjølve studielandet.

Merk:
Den generelle informasjonen på denne nettstaden gjeld skoleåret 2004-2005, men no veit du kva område det blir endringar på.

I mars 2005 vil den generelle informasjonen på nettstaden bli oppdatert for skoleåret 2005-2006.

Forskriftene for 2005-2006 er klare, og inneheld alle regelendringane. Nærmare reglar til forskriftene ligg ikkje føre enno.