Samandrag

I fjerde kvartal hadde Statens petroleumsfond ei avkasting på 7,02 prosent målt i den valutakorga som svarar til samansetjinga av Petroleumsfondet sin referanseportefølje. Målt i norske kroner var avkastinga for perioden 13,89 prosent. Skilnaden mellom dei to avkastingstala kjem av at den norske krona svekte seg med 6,42 prosent i høve til valutakorga til referanseporteføljen. I samband med måling av verdiar og utrekning av avkasting, bør ein ta utgangspunkt i utviklinga av den internasjonale kjøpekrafta til Petroleumsfondet. Det er difor meir relevant å vurdere avkastinga til fondet målt i valutakorga til referanseporteføljen, enn i norske kroner.

Avkastinga på aksjeporteføljen i fjerde kvartal var 17,51 prosent målt i valutakorga til referanseporteføljen. Det var sterk kursoppgang i alle dei viktigaste aksjemarknadene. Obligasjonsporteføljen hadde i fjerde kvartal ei avkasting på 0,38 prosent målt i valutakorga til referanseporteføljen. Avkastinga i marknadene for statsobligasjonar varierte stort mellom landa og gjennom kvartalet. I oktober viste indeksane i dei viktigaste marknadene for statsobligasjonar negativ avkasting for første gong på 14 månader, i november og desember viste dei fleste marknadene ei positiv avkasting att. Ei viktig årsak til dette var at mange sentralbankar reduserte rentene sine i denne perioden.

For heile 1998 hadde Petroleumsfondet ei avkasting på 9,25 prosent målt i valutakorga til referanseporteføljen. Avkastinga på aksjeporteføljen var 12,86 prosent og avkastinga på obligasjonsporteføljen var 9,31 prosent. Målt i norske kroner hadde Petroleumsfondet ei avkasting på 19,75 prosent i 1998.

I fjerde kvartal var avkastinga på Petroleumsfondet 0,03 prosentpoeng lågare enn avkastinga på referanseporteføljen. Aksjeporteføljen hadde ei mindreavkasting på 0,28 prosentpoeng i høve til aksjedelen av referanseporteføljen, medan obligasjonsporteføljen hadde ei meiravkasting på 0,31 prosentpoeng i høve til obligasjonsdelen av referanseporteføljen. Totalt for heile året hadde Petroleumsfondet ei meiravkasting på 0,20 prosentpoeng målt i norske kroner.

Petroleumsfondet fekk overført 11,0 milliardar kroner den 30. november. Ved utgangen av 1998 var marknadsverdien til fondet sin aksje- og obligasjonsportefølje 171,8 milliardar kroner.

---

Norges Bank, Bankplassen 2, Postboks 1179 Sentrum, 0107 Oslo, Norway, Telefon +47 22 31 60 00, Telefaks +47 22 41 31 05, e-post: investment.management@moa.norges-bank.no