1. Mandat for forvaltinga

Noregs Bank forvaltar Petroleumsfondet i samsvar med forskrift fastsett av Finansdepartementet 3. oktober 1997. Forskrifta er å finne i Nasjonalbudsjettet 1998.

I forskrifta vert området som Petroleumsfondet kan investere i, avgrensa til 21 land. I samsvar med forskrifta har Finansdepartementet bestemt ein referanseportefølje for Petroleumsfondet. Referanseporteføljen er sett saman av spesifiserte indeksar for aksjar og obligasjonar i dei 21 landa. Aksjar utgjer 40 prosent av referanseporteføljen. Referanse-porteføljen er utgangspunktet for risikostyringa av Petroleumsfondet og grunnlaget for resultatmålinga av den forvaltinga Noregs Bank gjer. Den øvste grensa for kva marknadsrisiko Petroleumsfondet kan ha i høve til referanseporteføljen, er 1,5 prosentpoeng forventa relativ volatilitet. Målingar av grensa for marknadsrisiko er baserte på daglege utrekningar i risikostyringssystemet BARRA.

Relativ volatilitet vert definert i kapittel 6. I kvartalsrapporten for første kvartal 1998 vart referanseporteføljen og grensa for marknadsrisiko grundig omtala. Desse omgrepa er også omtala i Petroleumsfondet sin årsrapport for 1998.

Referanseporteføljen vart gradvis teken i bruk frå 1. januar 1998 etter ein plan for opptrapping som var bestemt av Finansdepartementet. Referanseporteføljen galdt fullstendig frå 1. juni 1998 då §§ 5 og 6 i forskrifta frå Finansdepartementet tok til å gjelde. I samsvar med § 5 skal porteføljen ha 50-70 prosent renteberande instrument og 30-50 prosent eigenkapitalinstrument. § 6 i forskrifta seier at 40-60 prosent av porteføljen skal vere investert i Europa, 20-40 prosent i Amerika og 10-30 prosent i Asia og Oseania.

Frå og med 30. juni i 1998 gjekk ein over frå årlege til kvartalsvise overføringar til Petroleumsfondet. I fjerde kvartal skjedde overføringa 30. november slik at det vart gjort unntak frå prinsippet om overføring i slutten av kvartalet. Årsavslutting av rekneskapen og innføring av euro ville krevje mykje tid og ressursar ved årsskiftet. Etter råd frå Noregs Bank valde difor Finansdepartementet å framskunde overføringa med ein månad. Den 30. november vart 11 milliardar kroner overført til Petroleumsfondet. Totalt for 1998 har det vorte overført 32,8 milliardar kroner.

---

Norges Bank, Bankplassen 2, Postboks 1179 Sentrum, 0107 Oslo, Norway, Telefon +47 22 31 60 00, Telefaks +47 22 41 31 05, e-post: investment.management@moa.norges-bank.no