Ettergiving i Finnmark og Nord-Troms

Du kan få ettergitt ti prosent av det opphavlege lånet, maksimalt 25 000 kroner per år, dersom du bur og arbeider i Finnmark eller Nord-Troms.

Ettergivinga skjer på etterskott når du har budd og arbeidd i regionen i tolv månader samanhengande.

Busett og yrkesaktiv

Busett
Vi reknar deg som "busett" når du både har folkeregistrert adresse i regionen og faktisk bur der.

Yrkesaktiv 
Vi reknar deg som "yrkesaktiv" når du

• har arbeid som utgjer minst 50 prosent av fulltidsarbeid
• har fulltidsarbeid i minst seks månader, og er registrert som arbeidssøkjar til fulltidsarbeid i resten av oppteningsperioden
• har omsorg for barn under ti år, eller har særleg tyngjande omsorgsplikter i den nærmaste familien

Slik søkjer du

Søknaden om ettergiving sender du når du har budd og arbeidd i regionen i tolv månader samanhengande (ein oppteningsperiode). Du må sende søknad for kvar ny oppteningsperiode. Bruk søknadsblankett F, som du kan skrive ut herifrå.

Du må leggje ved dokumentasjon på yrkesaktivitet. Dersom du har vore arbeidsledig, må du også dokumentere det. Søkjer du på grunn av omsorg, legg du ved fødselsattest, eventuell attest på at du har særleg tyngjande omsorgsplikter i den nærmaste familien.

Søknadsfrist

Søknaden må vere motteken av Lånekassen seinast tre månader etter at oppteningsperioden er ute, for at kravet ikkje skal bli forelda.

Meir informasjon om tiltakssona

Du finn meir informasjon om ordningane for Finnmark og Nord-Troms på www.tiltakssonen.net