Flyktningstipend
Kven har rett til flyktningstipend?
Du kan få flyktningstipend dersom du er utanlandsk statsborgar, har fått asyl i Noreg og tek vanlig vidaregåande opplæring her i landet, eller tek grunnskoleopplæring som du har rett til etter opplæringslova § 4A-1.
Kor lang tid kan du få flyktningstipend?
Dess tidlegare du begynner i utdanning etter at du kom til Noreg, dess lengre tid kan du få flyktningstipend.
- Begynner du på utdanninga innan tre år etter at du kom til Noreg, kan du få stipend i inntil tre år
- Begynner du på utdanninga innan fire år etter at du kom til Noreg, kan du få stipend i inntil to år
- Begynner du på utdanninga innan fem år etter at du kom til Noreg, kan du få stipend i inntil eitt år.
Tida blir rekna frå den datoen du fekk godkjent asyl.
Perioden frå dato for asyl og byrjinga av utdanninga blir utvida med to år dersom du
- har barn eller får barn i løpet av den tida du normalt kunne fått flyktningstipend. Utdanninga må ta til før barnet er fylt ti år.
- har rett til grunnskoleopplæring før du begynner på vanleg vidaregåande opplæring.
Kor mykje pengar er flyktningstipendet?
Går du i vanleg vidaregåande opplæring som du har rett til etter opplæringslova, blir støtte rekna ut på same måte som for norske elevar. Forskjellen er at du får heile beløpet som stipend, så nær som lån til dekning av skolepengar.
Går du i grunnskole som du har rett til etter opplæringslova eller i vidaregåande opplæring som du ikkje har rett til etter opplæringslova, blir støttebeløpet rekna ut på same måte som for norske studentar i høgare utdanning. Skilnaden er at du får heile beløpet som stipend, sett bort frå lån til dekning av skolepengar.
Du kan sjølv rekne ut beløpet med støttekalkulatoren. Hugs at alt unnateke lån til skolepengar er stipend.
Dersom du avbryt utdanninga, kan pengane du har fått, bli krevd tilbake.