Rentefritak ved fødsel og omsorg
Fødsel
Dersom du dokumenterer fødsel og omsorgspermisjon etter fødsel, og bruttoinntekta di per månad ikkje er over 14 980 kroner, kan du få rentefritak. Inntektsgrensa blir auka med 1 500 kroner for kvart barn under 16 år du forsørgjer.
Det kan bli gitt rentefritak i inntil tolv månader til den av foreldra som har omsorga for barnet. Det same gjeld ved adopsjon av barn under ti år. I periodar der foreldra deler omsorga, kan rentefritaket delast.
I perioden på tolv månader frå fødsel blir ikkje inntekta til ektefelle, sambuar eller partnar teken med i vurderinga. Det blir den derimot dersom du søkjer rentefritak for meir enn tolv månader, sjå avsnittet nedanfor.
Omsorg for barn eller pleietrengande i nær familie
Dersom du har omsorgsarbeid som varer i minst tre månader samanhengande, og inntekta di ikkje er høgare enn 14 980 kroner brutto per månad, kan du ha rett til rentefritak. Inntektsgrensa blir auka med 1 500 kroner for kvart barn under 16 år du forsørgjer. Som omsorgsarbeid blir rekna omsorg for barn under ti år eller omsorg for uføre, funksjonshemma eller eldre med stort pleiebehov i den nærmaste familien.
Rentefritak blir vurdert i forhold til inntekta til ein eventuell ektefelle, partnar eller sambuar. Rentefritak blir berre gitt til den som sjølv har inntekt under grensa. Det er ein føresetnad at familien si samla bruttoinntekt er under 29 960 kroner per månad. Grensa blir auka med 3 000 kroner for kvart barn under 16 år du forsørgjer. Som sambuar blir berre rekna sambuar som du har felles barn med.
Slik søkjer du
Bruk søknadsblankett I. Skriv ut blanketten her.
Dokumentasjon:
- Stadfesting på bruttoinntekta di per månad .
- Fødselsattest for barn under 16 år.
- Stadfesting på inntekta til ektefellen, sambuaren eller partnaren din (berre dersom du søkjer om rentefritak i meir enn tolv månader etter fødselen, og dersom du søkjer på grunn av omsorg for pleietrengande).
- Stadfesting frå lege eller helsestyresmakt (berre dersom du søkjer på grunn av omsorg for pleietrengande).