- Det er for gale når storfilmar som «The Good, the Bad and the Ugly» ikkje har meir enn fire-fem betalande, sukkar Sverre Øvrelid Steen. Han er leiar i den nye filmklubben, som er ein fusjon av to tidlegare filmklubbar, Volum og Volda & Ørsta Filmklubb.
Styrka kulturtilbod
Steen seier at dei var klar over vanskane med å halde liv i denne typen tilbod, då dei i fjor haust tok til med å stable ein filmklubb på beina. Men dei trudde likevel at det skulle vere marknad for ein i filmklubb i bygda. I alle fall med det breie utvalet filmar dei set opp, forklarar han.
- Slik vi såg det for oss, ville dei to ulike fraksjonane styrke kvarandre, og på den måten famne eit større publikum, seier Steen.
Synkande interesse
Han omtalar gamle Volum Filmklubb som ein rein musikkfilmklubb, med musikkdokumentarar og konsertfilmar på programmet, medan Volda & Ørsta Filmklubben fokuserte på spelefilmar.
- Difor er eg overraska over at ikkje fleire finn vegen til visningane, påpeiker han.
- Rett nok var der ein del tilskodarar dei første vekene, men lufta gjekk ut av ballongen rimeleg fort.
