VINJE OG VINJE
Vinje er ein stad, og Vinje var ein skrivande mann. Den skrivande mannen var stadig i rørsle, både i kroppsleg og i tekstleg samanheng. Staden Vinje, for ikkje å snakke om Vinjestoga, skribentens barndomsheim, står derimot bom stille. Dette har blitt erfart gjennom ein sommar som omvisar i denne vesle husmannsstoga, der Vinje trødde rundt i sine fyrste tresko, der han las sine fyrste Holberg-stykke og brende sine fyrste dropar sprit av jordeple. Stoga er i dag stillstand, nesten bare besøkt av humler og fluger, og meg, ein omvisar fanga i ein blå vest-telemarkbunad i korrekt nasjonal og turistvenleg stil.