Den folkelige arkitekturen?
Kvifor er det slik at mange av oss rynker på nasa når me ser Kurt Nilsen si gitarhytte eller Kjell Inge Røkke sitt fjellpalass? Då eg jobba som journalist i Bergens Tidende sitt eigedomsmagasin Hus og hjem, var det ein ting som viste seg gang på gang på gang: Mykje pengar betyr stort sett det same som dårleg smak. Dei som har god råd byggjer stort, gjerne enormt, og har søyler og karnapp og terrassar større enn leilegheita mi. Innvendig: monumentale stolar, elgar i solnedgang og svære treskap. Eg tenkte det same kvar gong: Dersom eg hadde hatt mykje pengar, då skulle det vorte andre bollar. Eventuelt hus. «Vi har veldig mye å gå på når det gjelder innovativ, moderne arkitektur i Norge. Derfor er det synd at resurssterke og velstående mennesker ikke er mer kulturelt nyorienterte når de skal velge stil på boligen sin. De velger svært ofte liksom-tradisjonelt og nostalgisk, en stil som grenser opp mot det vulgære, når de skal bygge seg hus. Det blir veldig mye glasert takstein og prangende tak.»1